“Real” tomusky transferlerden boýun gaçyryp biler

Madridiň “Realy” tomusky transferlerden galyp biler, bu barada “Marca” ispan neşirine salgylanmak bilen gazeta.ru habar berýär.
Neşiriň maglumatlary boýunça, koronawirus pandemiýasy sebäpli ýüze çykan maliýe kynçylyklary kluba düýpli täsir edip biler.
Bellenilip geçilişi ýaly, “Real” transferleri diňe toparyň has köp futbolisti satyp bilen ýagdaýynda geçirip biler, ýöne munuň bolmak ähtimallygy pes, sebäbi beýleki ýewropa klublary ýokary tölegli oýunçylara çykdajy etmäge taýýar däl.
Öň, HBS tomusda “şa” klubyndan ýarym goragçy Hames Rodrigesiň gitjekdigini ýazdy. AS neşiriniň anyklaşdyrmagyna görä, kolumbiýaly oýunçy Madridiň “Atletikosyna” geçer. Toparlar eýýäm mümkin boljak şertnama barada gepleşiklere başladylar. Çeşme transferiň ähtimallygyny 80% diýip hasaplaýar.
La Liganyň häzirki ýaryşy wirus ýaýrawy sebäpli saklandy. Turniriň prezidenti Hawýer Tebas çempionatyň 11-nji iýunda “Sewilýa” – “Betis” oýny bilen dikeldiljekdigini aýtdy. Ispaniýanyň çempionatynyň 27 tapgyryndan soň “şa kluby” turnir tablisasynda ikinji orny eýeleýär. Onuň hasabynda 56 utuk bar. Çempionatda 58 utuk bilen “Barselona” liderlik edýär. Üçlügi 47 utuk gazanan “Sewilýa” jemleýär.