Çempionlar ligasynyň finalynyň Stambuldan Germaniýa geçirilmegi mümkin

UEFA Ýewrokubok möwsümini tamamlamagyň amatly taraplaryny gözden geçirmegini dowam etdirýär. Soňky maglumatlar boýunça, Çempionlar ligasynyň “dörtlügiň finaly” formatynda oýnalmagy, finalyň bolsa Germaniýada geçirilmegi ahmal. Şeýlelik bilen, Stambul esasy oýny geçirmek hukugyndan aýrylar. Bu barada gazeta.ru habar berýär. Çözgüt 17-nji iýunda ýerine ýetiriji komitetiň mejlisinde kabul ediler. Habar berlişine görä, indiki hepde UEFA Türkiýäniň resmi adamlary bilen çäräniň başga ýere geçirilmegi barada gutarnykly gürleşmek üçin gepleşikleri geçirer. UEFA Ýewrokubok möwsümini 31-nji awgusta çenli tamamlamagy göz öňünde tutýar. 
Futbol dünýäsi pandemiýadan soň ýuwaş-ýuwaşdan janlanyp başlady. Esasy Ýewropa çempionatlary 2019/20 möwsümi dowam etdirmäge biragyzdan diýen ýaly razy boldular: nemes Bundesligasy 16-njy maýda hereket edip başlady, geljek aýyň içinde Italiýanyň Seriýa A, ispan Premýerasyny we Angliýanyň Premýer-ligasyny dikeltmek meýilleşdirilýär. Möwsümi wagtyndan öň tamamlan diňe Fransiýa aradan aýryldy.
Ähli milli birinjilikler tamamlanandan soň, Ýewrokubok turnirleriniň galan oýunlary geçiriler diýlip çaklanylýar.
Çempionlar ligasynda we Ýewropa ligasynda möwsümiň tamamlanmagynyň möhümdigi sebäpli, Ýewropanyň futbol assosiasiýalarynyň birleşigi (UEFA) ýurtlaryň çempionatlarynyň doly tamamlanmagyny talap etdi. Boýun gaçyran guramalaryň geljekde ýewrokuboklara goýberilmejekdigi duýduryldy. Netijede, köp ýurtlar boýun bolmaly boldular.
“Biziň Ýewropa möwsümini tamamlamak boýunça anyk meýilnamamyz bar. Meniň pikirimçe, ligalaryň köpüsinde çempionatlar oýnalar. Muny ýerine ýetirmedikleriň bolsa, bu öz islegleri, ýöne eger olar UEFA turnirlerine gatnaşmak isleýän bolsalar, barybir kwalifikasion raundlarda oýnamaly bolarlar” – diýlip, Birleşigiň prezidenti Aleksander Çeferiniň sözleri getirilýär.