Italiýanyň futbol möwsümi 20-nji awgusta çenli uzaldyldy, täze möwsüm 1-nji sentýabrda başlanar

Ýaňy-ýakynda Italiýanyň futbol federasiýasynyň geňeşiniň mejlisi geçdi we onda birnäçe möhüm meseleler maslahatlaşyldy. Sky Sport Italia telekanalynyň habar bermegine görä, Seriýa A, Seriýa B we Seriýa C-däki möwsüm 20-nji awgusta çenli uzaldyldy. Bu barada euro-football.ru habar berýär. Şeýlelik bilen, italýan çempionatynyň oýunlary UEFA-nyň tomsuň soňky aýynda tamamlamagy göz öňünde tutan ýewrokubogy bilen ugurdaş geçmegi mümkin.
Möwsümiň Italiýanyň Kubogyny tamamlamak üçin 31-nji awgusta çenli hem uzaldylmagynyň mümkindigi bellenilýär. Indiki futbol möwsümini ýurtda 1-nji sentýabrda başlamagy meýilleşdirýärler.
Futbol oýunlarynyň gaýtadan saklanan ýagdaýynda federasiýa A, B we C Seriýalary üçin pleý-off ulgamyny girizmekçi bolýar. Şonda pleý-off tablisanyň ýokarky we aşaky bölegindäki komandalaryň arasynda oýnalar.
Futbol möwsümi doly bes edilen ýagdaýynda toparlaryň gutarnykly orunlary ýörite korrektirleýji görkezijileriň kömegi bilen hasaplanylar.
Maý aýynyň ortalarynda Italiýanyň premýer-ministri Juzeppe Konte ýurtda 14-nji iýuna çenli sport çärelerini geçirmegiň gadagandygy baradaky permana gol çekdi. Klublaryň köpüsi çempionaty 13-nji iýunda dikeltmäge ses berdiler.
Ýatladyp geçsek, häzirki wagtda ýer ýüzi koronawirus pandemiýasyny başdan geçirýär. Soňky maglumatlar boýunça, 5 milliondan gowrak keselleme ýagdaýy hasaba alyndy. 1,98 milliondan gowrak adam sagaldy.