Awiasiýa üçin plazmaly innowasion hereketlendirijisi döredildi

Hytaý alymlaryna ýokary awiasion ýangyjyny sarp etmeýän innowasion güýçli gurluşy döretmek başartdy. Bu barada politexpert.net habar berýär. Täze plazmaly hereketlendiriji elektrik razrýadda işlemek bilen, çekiş güýjüni howanyň esasynda döredýär.
Belläp geçsek, meselem, NASA Dawn kosmiki zondunda peýdalanylýan hereketlendirijiler ksenonly plazmany ulanýarlar, ol Ýeriň atmosferasyndaky päsgel güýjüni ýeňip geçip bilmeýär we şol sebäpli ol howa ýolunda ulanmak üçin ýeterlik derejede kuwwatly däl.
Geljekde raýat we harby awiasiýalarynda ulanylyp bilinjek bu döwrebap gurluşy Hytaýyň Uhan şäheriniň alymlary hödürlediler. Bu gurluş häzirki wagtda kosmiki enjamlarda ulanylýan herekete getirijilere meňzeş. Bu gurluş ýangyjy ýakmaýar we parnik täsirini hem-de global ýylamany güýçlendiriji kömürturşy gazy çykarmaýar.
Onuň iş prinsipi hem ýönekeý. Gurluş tarapyndan sarp edilýän howa ýörite kompressor tarapyndan sordurylýar we gysylýar, ondan soň mikrotolkunlar arkaly ionlaşdyrylýar. Howa akymynda dörän elektrik meýdany bilen çaltlaşyp ýola düşýän plazmanyň zarýadlanan bölejikleri emele gelýär. Ahyrynda asmana howa gämisini galdyrmaga mümkinçilik berýän reaktiw akymy ýüze çykýar. Gaty bedenden, suwuklykdan we gazdan başga plazma maddanyň zarýadlanan ionlardan ybarat bolan dördünji ýagdaýy hasaplanýar.
Ýöne Hytaý hünärmenleriniň täze enjamynyň kuwwatlylygy heniz ýeterlik derejede ýokary däl, ol diňe howa agramy bir kilogram töweregi bolan polat şaryny galdyrmaga ýetýär. Ýöne hünärmenler hereketlendiriji gerekli ölçege çenli, ýeterlik derejede ýeňil göwrüme getirilip bilner diýip nygtaýarlar. Şeýle-de, olar täze gurluşyň beýlekilerden ekologik taýdan we tas doly derejeli galmagalsyz işi bilen tapawutlanýandygyny bellediler.