Hytaýda iň uly futbol stadionynyň gurluşygyna başlanyldy

HHR-de 100 müň töweregi tomaşaçy ýerleşýän iň uly futbol stadionynyň gurluşygy Hytaýyň Guançžou günorta welaýatynda başlandy. Bu barada Xinhua agentligine salgylanmak bilen football.kulichki.net habar berýär.
Täze stadionyň meýdançasy, takmynan, 150 müň inedördül metre, onuň töweregindäki umumy gurluşyk meýdançasy bolsa 300 müň inedördül metre barabar bolar. “Guançžou Ewergrand” kluby degişli bolan “Ewergrand topar” kompaniýasy bu sport obýektiniň eýesi bolar. Kompaniýanyň sport toplumynyň gurluşygyna maýa goýumy 12 mlrd ýuana ($1,69 mlrd töweregi) deň boldy.
Meýdançanyň eýeleri stadion 2023-nji ýyldaky Aziýanyň Kubogyna taýýar bolar diýip hasaplaýarlar. Gurluşyk işleri 2022-nji ýylyň ahyryna çenli tamamlanar. Bu meýdança lotos gülüniň formasyny ýada salar. “Guançžou” häzirki wagtda Hytaýyň çempiony hasaplanylýar.
Mundan başga-da kompaniýa Hytaýda 80-den 100 müňe çenli tomaşaçy ýerleşýän üçden bäşe çenli futbol stadionlaryny gurar.
Hytaýda täze futbol möwsüminiň başlanmagy koronawirus pandemiýasy sebäpli soňa goýuldy. Hytaýyň futbol assosiasiýasy çempionaty iýunda ýa-da iýulda başlamagy meýilleşdirýär.