“Barselona” çökgünlik sebäpli tomusda Neýmary satyn almaz

“Pari Sen Žermeniň” hüjümçisi Neýmar tomus transfer penjiresinde “Barselona” dolanmaz.
Gazeta.ru saýtynyň “Catalunya Radio” radiotoruna salgylanyp habar bermegine görä, katalonlylar koronawirus pandemiýasy sebäpli ýüze çykan maliýe çökgünliligi bilen baglylykda braziliýaly oýunçynyň transfer mümkinçiligini aradan aýyrdylar.
COVID-19-yň esasynda emele gelen durnuksyz ykdysady ýagdaý transfer bazaryna öz täsirini ýetirdi. Eger-de pandemiýadan öň Neýmar “Barselonanyň” esasy transfer maksady bolan bolsa, häzir katalon kluby 170 mln ýewro sarp etmeli bolan braziliýaly hüjümçini satyn almak mümkinçiligini öz maksadyndan aýyrdy.
Häzirki wagtda “Barselonanyň” esasy transfer maksady “Interiň” hüjümçisi Lautaro Martines bolup durýar. Katalonlylar eýýäm futbolistiň ýagdaýy bilen gyzyklandylar. Argentinalynyň şertnamasynda ondan ýüz öwren ýagdaýynda 111 mln möçberde pul tölemelidigi barada punkt bar, ýöne gök-gyzyllar ylalaşyga öz oýunçylaryny girizmek arkaly bahany peseltmäge synanyşarlar.
Mundan başga-da, “Barselona” Lionel Messi bilen şertnamanyň möhletini uzaltmak meselesinde ünsi jemlär.
Belläp geçsek, Neýmar 2017-nji ýylyň tomsunda “Barselonadan” “PSŽ-a” rekord möçberindäki baha, ýagny 222 mln ýewro geçdi. Heniz Neýmaryň bu ýagdaýa nähili garajagy belli däl. Sebäbi hüjümçi Ispaniýa dolanmak isleýärdi, “Barselona” bolsa munuň amala aşyryljagyna söz berdi. Ispan HBS-i Neýmaryň “Barselonanyň” wadasy esasynda “Reala” geçmändigini belleýär. Eger-de bu hadysa ýakyn wagtda bolup geçmese, onda Neýmaryň hem ýene bir ýyl Parižde galmazlyk üçin “Realyň” teklibini kabul edäýmegi ähtimal.