“Sentýabr uzakda däl, asuda wagty urşa taýýarlyk görmeli”. Habib Toni bilen göreşe yşarat etdi

Garyşyk stiliň russiýaly göreşijisi Habib Nurmagomedow özüniň ýakyndaky göreşini sentýabrda geçirmeginiň mümkindigine yşarat etdi diýip news.sportbox.ru habar berýär.
— Sentýabra uzak wagt galmady, meniň özümem ähli zadyň sentýabrda gutarjakdygyna kynlyk bilen ynanýaryn, ýöne bir adam asuda wagty urşa taýýarlyk görmelidigini aýtdy” – diýip, Nurmagomedow özüniň Instagramdaky sahypasynda ýazýar.
Ýatladyp geçsek, Nurmagomedow UFC 249 turnirinde Toni Fergýusona garşy ýeňil agramda çempion guşagyny goramalydy. Emma ol Russiýadan çykyp bilmändigi sebäpli, oňa gatnaşyp bilmedi.
Habibiň deregine Jastin Getji çykmalydy, emma soň turnir koronawirus pandemiýasy zerarly ýatyryldy. Habibiň tälimçisi Hawýer Mendes hem ýeňil agramda UFC-niň çempionynyň oktagona dolanan wagtynda onuň garşydaşy hökmünde kimi görmek isleýändigini gürrüň berdi.
“Biz ony sentýabrda ýa-da awgustda görüp bileris. Eger bu awgustda bolsa, San-Fransiskoda bolar. Eger-de sentýabrda bolsa, ol Abu-Dabidäki turnire dolanyp barar. Bu iki wariantyň haýsy hem bolsa biri bolar” – diýip, MMAFighting web-saýty Mendesiň sözlerini getirýär.
Mendesiň pikiriçe, Habibiň Toni Fergýuson bilen göreşini gurnamaga edilen bäş şowsuz synanyşyk Nurmagomedowa başga bir garşydaşy bermäge esasy sebäp bolup durýar.
“Eger-de men saýlamaly bolsam, men Jastin Getji bilen göreşi saýlardym, şonda biziň göreşiň geçiriljegine ynamymyz bolardy. Diňe şu sebäp bilen men Getjiniň garşydaşymyz bolmagyny isleýärin. Bolan zatlary göz öňünde tutsak, onda entek hemme zadyň üýtgemegi ahmal”.
“Toni Fergýuson güýçli urşujy, ýöne eger-de göreşi belli etmeseler, men gaty alada etmerin, sebäbi göreşiň altynjy gezek ýatyrylmak gorkusy meni türgenleşik lagerinde hemişe yzarlap gezer. Beýle zat öň bolmandy”.