Italiýanyň çempionatyny 2021-nji ýylyň ýanwaryna çenli tomaşaçysyz geçirmek göz öňünde tutulýar

Italiýanyň hökümeti ýurtda futbol oýunlaryny tomaşaçysyz geçirmegi meýilleşdirýär. Bu çäklendirme 2021-nji ýylyň ýanwaryna çenli dowam eder. Bu barada beIN Sports telekanalynyň žurnalisti Twitterde habar berýär. Öň Seriýa A-nyň 31-nji maýda dikeldiljekdigi belli bolupdy diýip soccer.ru habar berýär.
“Italiýanyň hökümetinden gelýän informasion akymlar täze düzgün boýunça tomaşaçylaryň 2021-nji ýylyň ýanwaryna çenli münbere goýberilip bilinmejekdigi barada aýdýar” – diýlip postda bellenilýär.
Italýan futbol federasiýasy tarapyndan bu barada resmi tassyklanma heniz ýok.
10-njy aprelde Italiýanyň premýer-ministri koronawirus infeksiýasynyň ýaýrawy zerarly çäklendiriji çäreleriň ýurtda 3-nji maýa çenli hereket etjekdigini aýtdy. Italiýada adatdan daşary çäreler 9-njy martda girizildi. Raýatlara ilatly nokatlarda we olaryň çäklerinde gaty zerur bolmasa hereket etmegi gadagan etdiler, mekdeplerde okuwlar we köpçülikleýin çäreler hem ýatyryldy. 12-nji martdan hökümet islendik söwda işini gadagan etdi, 22-nji martdan iň zerur bolanlardan galan ähli önümçilikler saklanyldy.
Ýurduň futbol birinjilikleriniň ähli oýunlary näbelli möhlet bilen saklanyldy. Ýokary diwizionyň, A seriýanyň, ähli klublary öz oýunçylarynyň aýlyklaryny kemeltmäge razy boldular.
26 tapgyrdan soň tablisada 63 utuk bilen Turin “Ýuwentusy” liderlik edýär. Rim “Lasionynda” bir bal az, üçlügi 54 utugy bilen Milan “Interi” jemleýär.