“Barselona” “Realyň” eks-goragçysy Ernandes bilen gyzyklanýar

“Milanyň” fransuz goragçysy Teo Ernandesiň Ispaniýanyň çempionatyna dolanmagy ahmal. News.sportbox.ru saýtynyň habar bermegine görä, 22 ýaşly futbolist bilen “Barselona” gyzyklanýar. Çünki katalonlylaryň ýolbaşçylygy toparyň çep gapdalyny berkitmeli, şonuň üçin olar eýýäm Ernandes boýunça teklip hem taýýarladylar. Transferiň bahasy 40 million ýewro bolar diýlip habar berilýär.
Belläp geçsek, “Milandan” öň Ernandes 2016-njy ýyldan 2019-njy ýyla çenli aralykda Madridiň “Realynyň” düzüminde çykyş etdi. Mundan başga-da, Turin “Ýuwentusy” hem Ernandes bilen gyzyklanýar. 2019-20 möwsümde Seriýa A-da fransuz oýunçysy “Milan” üçin 22 oýna gatnaşyp, 5 gezek gol saldy we 3 gezek netijeli geçirim etdi.
Ýatladyp geçsek, ýaňy-ýakynda “Barselonanyň” “Ýuwentusyň” hüjümçisi Federiko Bernardeskiniň transferi üçin iki oýunçydan aýrylmaga taýýardygy barada maglumat peýda boldy. “Barselonanyň” turin klubyna Bernardeskini Iwan Rakitiç bilen Samýuel Ýumtitä çalyşmagy teklip edendigi habar berilýär. Toparlar eýýäm tomus transfer penjiresinde şertnamalar boýunça gepleşikleri geçirmäge girişdiler. Çeşmäniň maglumatlaryna laýyklykda, Ýumtiti bilen “Çelsi” hem-de “Arsenal”, Rakitiç bilen bolsa “Mançester Ýunaýted” hem gyzyklanýar.
Bernardeski “Ýuwentusda” 2017-nji ýyldan bäri çykyş edýär, mundan öň ol “Fiorentinoda” oýnapdy. Şu möwsümde italýan oýunçysy milli çempionatda 18 duşuşyga gatnaşdy.