Türkmenistanyň Prezidenti Ahalteke atçylyk toplumyna we Olimpiýa şäherjigine baryp gördi

7-nji aprelde Türkmenistanda Bütindünýä saglyk gününiň giňden bellenilip geçilmeginiň çäklerinde Gurbanguly Berdimuhamedow Türkmenistanyň Prezidentiniň Ahalteke atçylyk toplumyna, şeýle hem Olimpiýa şäherjigine baryp gördi.
Ahalteke atçylyk toplumynda döwlet Baştutany Gyratym atly bedew bilen didarlaşyp, onuň bilen manežde türgenleşik geçdi. 
Soňra Gurbanguly Berdimuhamedow paýtagtymyzyň Olimpiýa şäherjigine gelip, bu ýerdäki welosiped ýodasynda ogly Serdar Berdimuhamedow bilen welosipedli ýöriş etdiler. Olimpiýa şäherjiginde üsti ýapyk welotrekde döwlet Baştutany welosipedde ýaryş ýodasy boýunça türgenleşik aýlawyny geçdi. Soňra beýleki ýolbaşçylar hem türkmen Lideriniň göreldesine eýerdiler
Olimpiýa şäherjigine baryp görmeginiň çäklerinde Gurbanguly Berdimuhamedow egindeşleri bilen sagdyn durmuş ýörelgelerini berkitmegiň bedenterbiýe-sport hereketini ösdürmegiň ugurlaryny ara alyp maslahatlaşdy.
Maslahatyň barşynda döwlet Baştutany halkymyzyň saglygyny saklamagyň we berkitmegiň möhüm şerti bolan bedenterbiýäni ösdürmek meseleleriniň üstünde durup geçdi.
7-nji aprelde — Bütindünýä saglyk gününde beden we ruhy taýdan kämillige tarap bolan ymtylyşyň döredijilikli güýji sagdyn durmuş ýörelgesini söýýänleriň köpsanlysyny tutuş Türkmenistan boýunça badalga nokadyna çykardy. Dünýäniň köp ýurtlarynda koronawirus bilen baglanyşykly ýagdaýlaryň çylşyrymly bolmagynda galýan mahaly Türkmenistanda öz wagtynda görlen çäreleriň netijesinde ýiti ýokanç keseliň aralaşmagynyň öňüniň alynmagy üpjün edildi.
Bu ugurda milli Liderimiziň parasatly baştutanlygynda alnyp barylýan öňdengörüjilikli syýasatyň, şol sanda saglyk ulgamyna degişli syýasatyň netijesinde, mähriban Diýarymyzda şonuň ýaly ýagdaýlaryň öňi alyndy we öňüni alyş çäreleriniň geçirilmegi dowam edýär. Hut şoňa görä-de, Bütindünýä saglyk gününiň giňden bellenilmegi möhüm ähmiýete eýedir.