“Ýuwentus” Ronalduny 70 mln ýewro satar ýa-da çökgünlik zerarly aýlygy peseltmek bilen şertnamany uzaldar

“Ýuwentus” koronawirus pandemiýasy bilen bagly toparyň düşen kyn ýagdaýyndan çykalga tapmaga synanyşýar.
“A Bola” portugal gazetiniň “II Messaggero” gazetine salgylanmak bilen habar bermegine görä, çökgünlikden “Ýuwentus”-yň hüjümçisi Kriştianu Ronaldu zyýan çekip biler. Çeşmäniň maglumatlary boýunça, italýan kluby üç warianty gözden geçirýär.
Ýagny, Ronalduny başga bir kluba satyp bilerler (häzir hüjümçi 70 mln ýewro möçberinde bahalandyrylýar). Galan iki wariant bolsa onuň “Ýuwentusda” karýerasyny dowam etdirmegi bilen bagly. Ronaldu klub bilen şertnamasyny ýene bir ýyl uzaldyp biler, ýöne bu ylalaşyga laýyklykda, onuň aýlygy ep-esli peseldiler. Başga bir ýagdaýda, Ronaldu 2022-nji ýyla çenli, ýagny onuň häzirki şertnamasynyň möhleti tamamlanýança “Ýuwentusda” galar.
Öň, “Ýuwentusyň” oýunçylary bilen aýlyklary peseltmek barada ylalaşyga gelendigi belli boldy, şunuň esasynda klub 90 mln ýewro töweregi tygşytlap biler. Ronaldunyň bolsa “Ýuwentusyň” senatorlary Jorjo Kýellini (ideýany öňe sürüji) we Janluiji Buffon bilen gürleşeninden soň aýlygyň ýylda 3,8 mln ýewro peseldilmegine razy bolandygy habar berildi.
Ýatladyp geçsek, biz öň Kriştianu Ronaldunyň “Ýuwentusdan” gitmek isleýändigini habar beripdik. “Pari Sen-Žermen” we “Mançester Ýunaýted” bu oýunçy bilen gyzyklanýar. Bu klublar eýýäm oňa teklip hem etdiler.