Getji ýa-da Porýe Fergýusona garşy göreşde Habibiň ýerini çalşyryp biler

Ýeňil agram boýunça Absolýut göreş çempionatynyň çempiony Habib Nurmagomedow amerikaly Toni Fergýuson bilen göreş geçirer ýaly Russiýadan çykmaly bolýar diýip russian.rt.com saýtynda bellenilýär.
Rus hökümetiniň saýtynda aýdylyşy ýaly, 30-njy martda ýarygijeden başlap ýurduň territoriýasynda awtomobil, demir ýol arkaly, pyýada hereketler we geçirme boýunça derýa hem-de garyşyk nokatlar koronawirus zerarly wagtlaýyn ýatyrylar. Ýöne muňa garamazdan, eýýäm 27-nji martdan ähli awiagatnawlary gadagan edildi.
Şonuň üçin Toni Fergýusona garşy göreşde ýeňil agramly Jastin Getji UFC-niň ýeňil agram boýunça çempiony Habib Nurmagomedowyň ýerini çalşyryp biler. Habibiň serhetleriň ýapylmagy bilen Russiýadan çykyp bilmeýändigi sebäpli UFC Fergýusona Getjiniň kandidaturasyny hödürledi. 
Ýeňil agramly göreşiji Dastin Porýe hem Habib Nurmagomedowyň Toni Fergýuson bilen göreşmeli bolan UFC 249 turnirine gatnaşyjy bolmaga taýýardygyny habar berdi. 
“Taýýarlanmak üçin gaty bir oňaýly möhlet-ä däl, ýöne men maňa özümiň iň gowusydygymy subut etmäge mümkinçilik berjek islendik pursata ýapyşmaga taýýar.
Men eýýäm özümiň Toni bilen göreşmäge taýýardygym barada ýazan hatymy UFC-niň ýolbaşçylaryna iberdim” – diýip Porýe belleýär. Häzirki wagtda Habib-Fergýuson göreşi ýatyrylmak howpunyň astynda, sebäbi Habib Russiýadan çykyp bilenok. Belki 18-nji aprele çenli ýagdaý üýtgär. Häzirlikçe bolsa UFC 249 heniz hem 18-nji aprele meýilleşdirilen.
Öň Habib Nurmagomedow özüniň islendik biri bilen göreşmäge taýýardygyny aýtdy: “Islendik ýerde, islendik wagt. Hut şunuň üçin men häzirki sportsmen, häzirki çempion. Maňa diňe ýeri bilen wagty aýdyň, men şol ýerde bolaryn. Men islendik biri bilen uruşmaga taýýar. Ýöne käbir zat hemişe bize bagly däl”.