Konor karantin barada: “Azatlyga çykmaga bäş hepde galdy. Wagty hasaby başlady”

Iki diwizion boýunça UFC-niň ozalky çempiony Konor Makgregor koronawirus pandemiýasy wagtynda karantiniň düzgünlerini berk berjaý etmäge çagyryş bilen jemgyýete wideoýüzlenmesini ýazgy etdi, bu barada Sports.ru habar berýär.
“Hemmäňize salam, salam Irlandiýa! Häzir biz has düýpli çäklendirmeleri girizdik we maňa muny görmek ýakymly.
Görşüňiz ýaly, eger-de siz oýna girmeseňiz, siz ony ýeňip bilmersiňiz. Häzir biz şu oýna girdik, indi bolsa düzgünleri berk berjaý etmek bilen biz ýeňiş gazanarys.
Irlandiýalylara ýüzlenýärin – biz kanunlar, şeýle-de şu gün liderlerimiz tarapyndan öňe sürlen maslahatlary berjaý etmeli. Biz öýden iki metr uzaklykda bolmaly däl, hiç hili gezelenç etmeli däl we möhüm däl işleriň ählisini tamamlamaly.
Häzir biz muny hökman berjaý etmeli, men ýurdumyzyň saglygy we howpsuzlygy üçin dileg edýärin. Munuň esasynda biziň we biziň ýakynlarymyzyň durmuşynyň ykbaly çözülýär. Biz bilelikde türgenleşik işlerini öý şertlerinde güýçlendirmeli we biz immunitetimiz üçin sagdyn iýmiti kabul etmeli.
Beýleki milletlere ýüzlenýärin – bu çäreleri berjaý ediň we bäş hepdä taýýarlyk görüň. Şundan soň biz azat. Erkinlige çykmak üçin bäş hepde galdy. Biz muny etmegi başararys. Wagty yzlygyna sanamak häzir başlanýar” – diýip, Makgregor aýdýar.