Messi 70% aýlygyndan aýryldy. Klublar karantin wagtynda çykdajylary azaldýarlar

Çykdajylary azaltmagyň iň bir aýdyň ususly – bu futbolçylaryň aýlyklaryny kemeltmek. Meselem, “Barselonada” futbolçylaryň aýlygyna ähli çykdajynyň 66%-i gidýär. Futbolçylaryň tölegini azaltmak meselesi eýýäm FIFA-da maslahatlaşylýar, gurama ähli oýunçylara arakesme wagtynda aýlyklaryň iki esse peseldilmegine meýletin razy bolmagy hödürleýär.
Häzirlikçe käbir ligalar we klublar bu meseläni özbaşdak sazlamaga çalyşýarlar. Bu bolsa hatda iň köp hak tölenýän oýunçylaryň hem uly möçberli puly ýitirmegine getirýär.
Angliýa. IPL-iň (APL) klublary häzir aýlyklary azaltmak mümkinçiligini maslahatlaşýarlar. Iň amatly wariant hem hepdede 15 müň funt-dan köp gazanýan oýunçylaryň ählisi üçin aýlyklary 50% azaltmakdan ybarat.
Ýöne bu hem mümkin bolan wariantlaryň biri. Klublar bu meseläni maslahatlaşmak üçin ýene duşuşarlar. Şeýle-de aýlyklary 20% azaltmak hem ýeterlik diýen wariant hem hereket edýär. Bu bolsa esasan “baý bolmadyk” toparlara kömek eder, top-6-lyga girýän klublar bolsa islendik çözgüde goşularlar.
Ispaniýa. “Barselona” ähli toparlaryň (baryp gandbola we basketbola çenli) oýunçylary we ähli işgärler üçin aýlyklary 70% azaltdy. Ilki ylalaşmakçy boldular, emma bu başa barmady, şonda ERTE kanunyndan (Iş güýjüni sazlamagyň wagtlaýyn meýilnamasy) peýdalanyldy. Ol boýunça ähli zat kanuna laýyk ýerine ýetirildi. Bu kanundan “Atletiko” we “Espanýol” hem peýdalandy. “Real” bolsa heniz oýunçylarynyň aýlyklaryny peseldenok.
Italiýa. “Gazetta della Sport” neşiri Seriýa A-nyň klublarynyň häzirki wagtda çempionatdaky arakesme wagtynda aýlyklary doly derejede ýatyrmak barada maslahatlaşýandyklaryny ýazýar. “Ýuwentus” birnäçe çözgütleri gözden geçirýärler: aýlygyň bir böleginden ýüz öwürmek ýa-da arakesme wagtynda bir aýlap tölegsiz oňmak. Ronaldu muňa eýýäm razy boldy – ispan neşirleri portugaliýaly oýunçynyň 3,8 mln ýewro (ýyllyk aýlygyň 12% töweregi) ýitirip biljekdigini ýazýarlar.
Fransiýa. Liga 1-iň klublary ähli işgärler üçin aýlyklary iki esse peseldýärler. Hatda “PSŽ” hem klubdaky hemme adamlary bölekleýin ýa-da tehnologik işsizlige geçirýär. Bu parižlilere döwletden uly bolmadyk möçberde kompensasiýa almak bilen, 70% aýlygy tölemäge mümkinçilik berer.
Germaniýa. Bu ýerde klublar özbaşdak çäreleri amala aşyrýarlar. Öňdebaryjy klublar eýýäm uly bolmadyk toparlara maliýe taýdan kömek edýärler. Bundesliganyň käbir klublarynda oýunçylar beýleki işgärleriň peýdasyna aýlyklaryň azaldylmagyna razy boldular. “Bawariýa” bolsa oýunçylaryň aýlyklaryny 20% kemeltdi.