Türkmenistan we Belarus COVID-19-yň ýaýramagynyň öňüni alyş çärelerini maslahatlaşdy

Türkmenistanyň Daşary işler ministriniň orunbasary Wepa Hajiýew Belarus Respublikasynyň Türkmenistandaky Adatdan daşary we doly ygtyýarly ilçisi Wýaçeslaw Beskostyý bilen geçiren duşuşygynda koronawirusyň ýaýramagynyň öňüni almak, şeýle hem daşary ýurtlarda galan raýatlaryň bähbitlerini goramak boýunça iki döwletiň ýolbaşçylary tarapyndan görülýän çäreler ara alnyp maslahatlaşyldy. Bu barada Belarusyň Türkmenistandaky ilçihanasynyň resmi internet saýtynda habar berilýär.
Duşuşygyň barşynda taraplar iki döwletiň arasyndaky gatnaşyklaryň dostlukly häsiýete eýedigini we dünýädäki epidemiologik ýagdaýyň ýaramaz netijelerini aradan aýyrmak meselesinde hyzmatdaşlygyň ýokary derejesini belläp geçdiler, diýlip habarda bellenilýär.
Bütindünýä saglygy goraýyş guramasy 2020-nji ýylyň 11-nji martynda COVID-19 täze koronawirus ýokanjyny pandemiýa diýip atlandyrdy.
Turkmenportal agentliginiň Belarus Respublikasynyň Saglygy goraýyş ministrligine salgylanyp habar berşi ýaly, Belarusda bu günki gün koronawirus ýokanjynyň 94 ýagdaýy ýüze çykaryldy. şolardan 32-si sagalyp, hassahanadan çykarylmaga taýýarlanýar, galanlary lukmanlaryň gözegçiliginde saklanýar. Şol bir wagtda COVID-19 ýokanjyndan aradan çykan ýeke ýagdaý hem hasaba alynmady.
Türkmenistanyň Saglygy goraýyş we derman senagaty ministrliginiň maglumatlaryna görä, ýurdumyzyň çäginde koronawirus ýokanjynyň ýeke ýagdaýy hem belleige alynmady.