Ýewropanyň iň “gymmat” klublary: “Ýuwentus” baha-hil gatnaşygynda iň gowusy

Ýewropa futbolynyň koronawirus pandemiýasy zerarly togtadylan wagtynda oýunçylarynyň umumy gymmaty boýunça Ýewropa ligalarynyň uly bäşliginiň liderlerini deňeşdirip göreliň. Köp ýagdaýlarda “iň baý” klublar iň üstünlikli klublar bolup çykýarlar diýip news.sportbox.ru belläp geçýär. Liderleri deňeşdirmek üçin biz Transfermarkt statistik çeşmesiniň möhüm maglumatlaryny peýdalandyk.
Ispaniýa. Iň “baý” kluby: “Real” – 1,08 mlrd ýewro. Ispan ligasy – klubdaky oýunçylaryň gymmaty nukdaýnazaryndan iň bäsdeş liga. Onda Madridiň “Realy” liderlik edýär, ýöne “Barselona” hem islendik wagt birinji orna geçip biler: olaryň arasyndaky tapawut bary-ýogy 20 mln ýewro. Ýöne katalon futbolistleriniň ortaça gymmaty ýokary (degişlilikde, 48,17 mln 41,54 mln-a garşy), ýöne olaryň talapnamadaky sany az: 26 22-ä garşy.
Liderdigine garamazdan, madridliler Premýerada eýýäm iki ýyl bäri ýeňiş gazanyp bilenoklar, 2016/17 möwsüme çenli bolsa bu dört ýyla barabar boldy. Ýurduň kubogyny “Şa kluby” alty ýyl bäri alyp bilenok. 
Angliýa. Iň “baý”: “Mançester Siti” – 1,27 mlrd ýewro. Soňky iki ýylyň içinde Angliýanyň çempionatynda titul üçin iki klub – “Mançester Siti” bilen “Liwerpul” göreşýär. Olar ligada öz oýunçylarynyň umumy gymmaty boýunça-da liderlik edýärler: 1,27 mlrd 1,19 mlrd-a garşy. Tutuş Ýewropada toparyň düzümi boýunça başga “baýlar” ýok. Bu iki topar geçen möwsümdäki görkezijileri bilen tapawutlandylar: mançesterliler iki sany milli baýraga eýe boldy, “Liwerpul” bolsa Çempionlar ligasyny utdy.
Germaniýa. Iň “baý”: “Bawariýa” – 935,15 mln ýewro. “Bawariýa” tituly, derejesi we puly boýunça-da Bundesliganyň esasy kluby. Futbolçylaryň umumy gymmaty boýunça onuň ýakyn bäsdeşi Dortmundyň “Borussiýasy” hasaplanylýar – ol mýunhenlilerden 250 mln ýewro yza galýar. 
Häzirki möwsümde “Bawariýa” dört utuk tapawut bilen birinji orunda barýar. Topar eýýäm sekiz ýyl yzygider Germaniýanyň çempiony titulyny hiç kime berenok. Geçen möwsümde olar Kuboga hem eýe boldular. 
Italiýa. Iň “baý”: “Ýuwentus”- 755,5 mln ýewro. Turinliler eýýäm birnäçe ýyl bäri ligada iň gymmat düzümi bilen tapawutlanýar we her ýyl milli titullara eýe bolýar. Häzirki wagtda “Ýuwentus” sekiz ýyl bäri Italiýanyň çempiony bolmak bilen, yzygider dokuzynjy baýraga hem dalaş edýär.  Oňa diňe geçen möwsümde ýurduň Kubogyna eýe bolan “Lasio” päsgel berip biler.
Fransiýa. Iň “baý”: “PSŽ” – 1,02 mlrd ýewro. Parižliler Ýewropada iň gymmat sport toparlarynyň birine eýe, olaryň ýurtda bäsdeşi ýok diýen ýaly. Ikinji orunda durýan “Lion”-yň düzümi hem iki esse arzan, ýagny 495 mln.
Ýedi möwsümde ýurduň çempionatynda olaryň alty ýeňşi bar. 2017-nji ýylda titula “Monako” eýe boldy. Geçen ýyl “PSŽ” finalda “Rennden” galyp, Kubogy almagy başarmady. Ýöne fransuz kluby ÇempionlarlLigasynda ýeňiş gazanmak isleýär, ol her gezek ýarym finala-da ýetip bilmeýär.