Dena Uaýt: Habib – Fergýuson göreşi geçiriler

UFC-niň prezidenti Dana Uaýtyň ynandyrmagyna görä, esasy wakasy ýeňil agramda çempion Habib Nurmagomedow bilen Toni Fergýusonyň göreşinden ybarat boljak UFC 249 turniri ýatyrylmaz. Bu barada championat habar berdi.
“Bizde Newadadan başlap, bu göreşi geçirmek üçin birnäçe potensial ýer bardy. Indi bolsa Newada warianty aradan aýrylýar, ýöne biz ýene birnäçe ýerleriň gözleginde. Bu göreş geçiriler. Janköýerler alada etmän bilerler. Habibiň Fergýusona garşy göreşi bolar” – diýip Uaýt Twitterde Sports Center sahypasynda ýerleşdirilen interwýuda gürrüň berýär. Häzirki pursatda Dana Uaýt bu göreşi geçirmek üçin iki sany wariant tapjak bolýar. Ol göreşi Las-Wegasda we Bruklinde geçirmekligiň eýýäm hasaba alynmaýandygyny aýdýar.
Ýatladyp geçsek, UFC koronawirus pandemiýasy bilen baglylykda turnirleri geçirmek üçin täze arenalary gözlemeli bolýar. UFC-niň prezidenti geljekki tomaşalaryň ählisiniň tertipnama boýunça geçiriljekdigine ynandyrýar.
Öň, Amerikanyň Newada ştatynyň Atletik komissiýasynyň koronawirus pandemiýasy zerarly ähli sport çärelerini saklamaklyk kararyna gelendigi barada informasiýa peýda boldy. Mundan başga-da, Nýu-Ýorkda sport çärelerini geçirmegi gadagan etme fonunda hut Las-Wegas UFC 249 turniri gurnaýjy üçin ätiýaç wariant bolupdy.
Habibiň kakasy we tälimçisi Abdulmanap Nurmagomedow hem Toni Fergýuson bilen göreşiň nirede geçiriljekdigi barada pikirini aýtdy.
“Bu Dubaý bolup biler. Birinjiden, ol ýerde kesel bilen göreşmek aňsat, sebäbi ol ýeri yssy. Meniň pikirimçe, Emirlikler hem UFC-niň göreşi üçin çalt we aňsat töläp bilerler. Göreş Russiýada geçirilip bilinmeýär” – diýip Nurmagomedow belleýär.
Belläp geçsek, öň Habib bilen Fergýusonyň göreşi dürli sebäplere görä dört gezek başa barmandy.