Gurbanguly Berdimuhamedow sanly wideoaragatnaşyk arkaly iş maslahatyny geçirdi

16-njy martda geçirilen sanly wideoaragatnaşyk arkaly iş maslahatynda Aşgabat şäherini hem-de sebitleri durmuş-ykdysady taýdan ösdürmek, möwsümleýin oba hojalyk işleriniň barşy bilen baglanyşykly meseleler ara alnyp maslahatlaşyldy.
Maslahatyň dowamynda göni wideoaragatnaşykda Aşgabat şäheriniň häkimi paýtagtymyzda alnyp barylýan işleriň ýagdaýy, ýurdumyzyň Garaşsyzlyk baýramy hem-de Bitaraplygyň 25 ýyllyk şanly toýy mynasybetli açylyp ulanylmaga beriljek binalarda we desgalarda gurluşyk işleriniň barşy barada hasabat berdi. Şeýle hem Milli bahar baýramy — Halkara Nowruz güni mynasybetli geçiriljek çärelere taýýarlyk görlüşi barada hasabat berildi.
Soňra welaýat häkimleri sebitlerde işleriň ýagdaýy, milli senenamamyzyň şanly seneleri mynasybetli ulanylmaga tabşyrylmagy göz öňünde tutulýan desgalarda gurluşyk işleriniň barşy barada hasabat berdiler. Şeýle-de gowaça ekişine taýýarlyk görlüşi, güýzlük bugdaýa ideg edilişi hem-de oba hojalygynda şu günler ýaýbaňlandyrylan beýleki işler, şonuň ýaly-da, öňde boljak baýramçylyklar mynasybetli guraljak çärelere taýýarlyk görlüşiniň barşy barada habar berildi.
Prezident Gurbanguly Berdimuhamedow hasabatlary diňläp, şanly seneler mynasybetli açylmagy göz öňünde tutulýan desgalaryň gurluşygynyň barşyna we hiline mundan beýläk-de berk gözegçilik etmegi tabşyrdy.
Döwlet Baştutany sebiti durmuş-ykdysady taýdan ösdürmegiň maksatnamasynda kesgitlenilen möhüm wezipeleri çözmäge aýratyn ähmiýet berilmelidigini nygtap, bu düýpli çäreleriň welaýatlaryň ilatynyň durmuş derejesini yzygiderli ýokarlandyrmaga hem-de senagat kuwwatyny pugtalandyrmaga gönükdirilendigini aýtdy.
Milli Liderimiz öňde boljak oba hojalyk möwsüminiň - gowaça ekişiniň möhümdigine ünsi çekip, gymmatly ekiniň ekişini guramaçylykly hem-de ýokary hilli geçirmäge düýpli taýýarlyk görmek üçin hemme zerur çäreleri görmegi, hususan-da, ýerleri we zerur tohumlary doly taýýarlamagy tabşyrdy.
Welaýatlarda Halkara Nowruz gününe hem-de ählihalk bag ekmek dabarasyna taýýarlyk görlüşi baradaky meselä degip geçip, olary ýokary derejede geçirmek üçin hemme çäreleri görmek barada görkezme berdi.