“Ýuwentus” Zidany çagyrmaklyga gyzyklanma bildirýär

“Ýuwentusyň” ýolbaşçylygy toparyň Maurisio Sarriniň ýolbaşçylygyndaky durnuksyz oýnundan nägile bolýar, şol sebäpli ýakyn möwsüm aralygynda Madridiň “Realynyň” baş tälimçisi Zinedin Zidany çagyrmak isleýär. Bu barada news.sportbox.ru habar berýär. 47 ýaşly fransuzyň hem Turin klubyna ýolbaşçylyk etmäge garşylygy ýok, çünki onuň ispan futbolçylary bilen gatnaşygy gaty bir gowy däl.
Çeşmäniň maglumatlaryna görä, turin kluby Zidana möwsüm üçin 8 million ýewro bilen üç ýyllyk şertnamany teklip etmäge taýýar.
“Ýuwentusyň” prezidenti Andrea Anýelli fransuz hünärmeni bilen gowy gatnaşyk saklaýar. Olar tomus dynç alyşlaryny bile geçirmegi gowy görýärler. Şol bir wagtda Zidan hem italýan klubyna geçmek mümkinçiligini gözden geçirýär, ýöne ol klubyň “Real” bilen şertnamany ýatyrany üçin tölemegini islemeýär.
Zidan bilen “Realyň” prezidenti Florentino Peresiň biri-biri bilen ýakyn gatnaşyk saklaýandygy habar berilýär, ýöne oýunçylaryň nägilelikleri baradaky gürrüňleriň esasynda bu gatnaşygyň ýaramazlaşmagy hem ahmal.
Turinliler fransuz tälimçisini Çempionlar ligasynda ýeňiş gazanmak üçin mynasyp dalaşgär hasaplaýarlar. Belläp geçsek, oýunçy hökmünde Zidan “Ýuwentus” üçin 1996-njy ýyldan 2001-nji ýyla çenli aralykda 150 oýna gatnaşdy. Şondan soň ol “Reala” geçýär we ol ýerde hem 2006-njy ýyla çenli oýnaýar. Zidanyň “Real” bilen häzirki şertnamasynyň möhleti 2022-nji ýylyň tomsunda tamamlanýar.
“Realyň” hasabynda Ispaniýanyň çempionatynyň 26 tapgyryndan soň 56 utuk bar we ol turnir tablisasyny esaslandyrýar, ol “Barselonadan” bir bal üstün çykýar.
“Ýuwentus” Italiýanyň çempionatynyň 25 oýnundan soň 60 utuga eýe we ol ikinji ýerde. “Lasio” liderlik edýär, onuň 26 duşuşykdan soň 62 utugy bar.