Türkmen habar beriş serişdeleri “Türkmenistanyň Konstitusiýasyna üýtgetmeler we goşmaçalar girizmek hakynda” Türkmenistanyň Kanunyň taslamasyny çap etdiler. Taslamanyň elektron görnüşini şu salgydan görüp bolar.
Taslama çap edilenden soň gelip gowuşjak teklipler ýene-de bir gezek düýpli öwreniler we Kanunyň gutarnykly taslamasyny taýýarlamak işi dowam etdiriler. Ol Halk Maslahatynyň geljekki mejlisiniň garamagyna hödürlener.
Hil taýdan täze iki palataly Parlament gurluşyna geçilmegi bilen baglylykda, Konstitusiýa üýtgetmeleriň we goşmaçalaryň girizilmegi ýurdumyzyň jemgyýetçilik-syýasy durmuşynda möhüm taryhy waka öwrüler.
Şeýlelikde, gelip gowuşýan köp sanly tekliplere laýyklykda, wekilçilikli kanun çykaryjy häkimiýet bolup durýan iki palataly edaranyň bitewi ulgamyna Türkmenistanyň Halk Maslahatyny hem-de Mejlisini girizmek hakyndaky başlangyç gyzgyn goldaw tapdy. Şoňa görä-de, garamagyňyza hödürlenen resminamada Türkmenistanyň Konstitusiýasyndan 61 belgili maddany aýyrmak teklip edilýär.
Şeýle hem taslamada Konstitusion topara gelip gowuşýan teklipler bilen baglylykda we iki palataly parlamenti bolan ýurtlaryň tejribesini nazara alyp, Milli Parlament Türkmenistanyň Milli Geňeşi, onuň kanun çykaryjy palatasy — Mejlis, wekilçilikli palatasyny bolsa Halk Maslahaty diýlip atlandyryldy.
