2019-njy ýylda Türkmenistanyň we Russiýa Federasiýasynyň özara haryt dolanyşygy 2,6 esse ýokarlandy

Geçen ýylda Türkmenistanyň we Russiýa Federasiýasynyň özara haryt dolanyşygy 2,6 esse ýokarlandy. Bu barada Prezident Gurbanguly Berdimuhamedowyň we Russiýa Federasiýasynyň Prezidenti Wladimir Putiniň sişenbe güni geçiren telefon arkaly söhbetdeşliginiň dowamynda bellenilip geçildi. Şeýle hem ikitaraplaýyn hyzmatdaşlygyň esasy ugurlary ara alnyp maslahatlaşyldy.
Şunuň bilen baglylykda, söwda-ykdysady hyzmatdaşlygy mundan beýläk-de diwersifikasiýa ýoly arkaly ösdürmek, özara haryt dolanyşygynyň möçberlerini artdyrmak, maýa goýum işjeňligini höweslendirmek, täze özara bähbitli taslamalary durmuşa geçirmek üçin uly kuwwatyň bardygy bellenildi.
Russiýanyň işewür toparlary geljegi uly türkmen bazarynda eýeleýän ornuny has-da giňeltmäge çalyşýandyklaryny görkezýärler. Indi ençeme ýyllardan bäri Russiýa Federasiýasynyň meşhur kompaniýalarynyň birnäçesi türkmen bazarynda üstünlikli işleýär.
Şunuň bilen baglylykda, Wladimir Putin türkmen kärdeşine iki tarapyň hem bähbitlerine laýyk gelýän sebit gatnaşyklaryny işjeňleşdirmäge uly üns berýändigi üçin hoşallyk bildirdi.
Söhbetdeşler sebit we ählumumy meseleleriň birnäçesi boýunça pikir alşyp, Türkmenistanyň hem-de Russiýa Federasiýasynyň ählumumy parahatçylygy, howpsuzlygy we abadançylygy üpjün etmek maksady bilen, BMG-niň hem-de beýleki abraýly halkara guramalaryň çäklerinde netijeli hyzmatdaşlyga ygrarlydygyny tassykladylar.
Türkmen Lideri russiýaly kärdeşini Türkmenistanyň Bitaraplygynyň 25 ýyllyk baýramçylygy mynasybetli geçiriljek dabaralara gatnaşmaga çagyrdy.