Täze ýedi orunly Suzuki krossoweri görkezildi

Suzuki kompaniýasy aziýa bazarlary üçin niýetlenilen, “kompaktwen ýaly amatly krossoweri” – XL7 modeliniň tanyşdyrylyş dabarasyny geçirdi. Bu täze krossower iki göwrümli kuzowy, kiçiräk gabarada ýedi orunly salony bilen tapawutlandy. Bu barada motor.ru habar berýär.
Suzukiniň gammasynda 2000-nji ýylyň ikinji ýarymynda XL7 modeli bolupdy, ýapon öndürijisi demirgazyk amerikan bazary üçin General Motors bilen bilelikde işlenilip düzülen we 2009-njy ýyla çenli çykarylan orta göwrümli ýol ulaglaryny şeýle atlandyrypdy.
Bu ulag serişdesi diňe Indoneziýanyň awtomobil bazarynda satylar. Ýapon kompaniýasynda bu bazaryň XL7 modeli üçin şowly ýer boljakdygyny nygtaýarlar, çünki ýerli awtosöýüjiler miniwenleri gowy görýärler, muňa garamazdan, krossowerleriň meşhurlygy hem barha artýar.
Brendiň wekilleri täze ulag serişdesiniň “iki esse urgy” bermäge ukyplydygyny, sebäbi onda hem krossoweriň, hem miniweniň häsiýetleriniň jemlenýändigini belleýärler.
Tassyklanylmadyk maglumatlar boýunça ýapon kompaniýasynyň täze modeliniň uzynlygy – 4450 - millimetr, ini – 1775 millimetr, beýikligi – 1710 millimetr.
Ulag serişdesi benzinli bir ýarym litr güýçli enjam arkaly herekete getirilýär. Heniz Indoneziýanyň awtosöýüjilerine bu modeliň nähili komplektasiýada we näçeräk baha bilen hödürlenjekdigi belli däl. Satuwa başlanjak sene barada hem maglumat ýok.