Hindi ylgawçysy gäwmiş bilen Useýn Boltuň rekordyny täzeledi

Gäwmişleri gatnaşdyrmak bilen geçirilýän hindi milli ýaryşy bolan “Kambala” wagtynda ylgawçy Sriniwasa Gauda Ýamaýkanyň meşhur türgeni Useýn Boltuň rekordyny täzeledi. Ol 100 metr aralygy 9,55 sekundyň içinde geçdi. Bu barada “TV5 Kannada” teleýaýlymyna salgylanmak bilen life.ru habar berýär.
2009-njy ýylda ýeňil atletika boýunça Dünýä çempionatynda ýamaýkaly türgen 100 metr aralygy 9,58 sekundyň içinde geçipdi.
142 metr bolan tutuş ýoly Gauda 13,62 sekundyň içinde geçdi. Şeýle-de bolsa, ol ylgaw zähmetiniň bir bölegini öz üstüne alan ýoldaşlaryny, ýagny gäwmişleri hem ýatdan çykarmady.
Öküzleriň gatnaşmagynda geçirilýän “Kambala” ýaryşy – bu Hindistanyň Karnataka ştatynyň kenar ýakasynda geçirilýän gadymdan gelýän ýaryş. Ylgawçylar iki sany gäwmiş bilen 132 ýa-da 142 metr aralygy geçmeli bolýarlar, bu ýol bolsa suwa basdyrylan şaly meýdany boýunça gidýär. 2014-nji ýylda bu baýramçylyk hindi hökümeti tarapyndan gadagan edilýär, ýöne birnäçe wagt geçenden soň onuň düzgünleri täzeden işlenilip, bu baýramçylyga ýene-de rugsat berilýär.
Häzir bolsa Hindistanyň hökümeti ylgawçy Sriniwasa Gaudany barlamakçy bolýarlar.
— Hindistanyň sport guramasynyň resmi adamlary eýýäm onuň bilen habarlaşdylar. Oňa demir ýol petegi satyn alyndy, ol eýýäm duşenbe güni gurama geler. Men milli baş tälimçileriň ony bolmalysy ýaly barlamagy üçin ähli zady gurnaryn – diýip, ýurduň Ýaşlar we sport işleri boýunça ministrliginiň ýolbaşçysy Kiren Rijidju habar berýär.