Ýokary gan basyşynda maslahat berilmeýän üç önüm

Ýokary arterial basyşly adamlar öz iýmitine doly derejede gözegçilik etmeli we ýörite berhiz saklamaly.
Kubnews.ru saýtynyň habar bermegine görä, lukmanlaryň pikiri boýunça, gipertoniýadan häzirki wagtda Ýer şarynyň ilatynyň, takmynan, üçden bir bölegi ejir çekýär. Bu keseliň ýüze çykmagyna zyýanly endikler (alkogol we çilim çekmek), iýmitiňi nädogry saýlamak we pes fiziki işjeňlik täsir edýär.
Emma tonometrdäki görkeziji heniz ýokary bolmadyk mahaly, adamlaryň köpüsi özlerinde gipertoniýanyň bardygyny hem bilmeýär. Ony bolsa lukman anyk kesgitläp bilýär. Ýöne lukmana gan basyş has howply derejä baryp ýetende däl-de, tonometrde sähel üýtgeşmeler ýüze çykdygy görünmeli. Munuň özi eýýäm adamyň organizminde ýakymsyz özgermäni görkezýän howsalaly ýagdaýdyr.
Adam öz keselini bilmeýän wagty ol adaty durmuş obrazyny dowam etdirýär we organlaryň hem-de sistemalaryň işine has hem zyýan ýetirýär. Basyşyň böküşi netijesinde gan damarlary çalt güýçden galýar. Bu bolsa infarkta we insulta getirip bilýär.
Şonuň üçin alkogoldan we çilim çekmekden hökman ýüz öwürmeli, maşk etmeli we iýmit rasionyny sagdyn iýmitiň peýdasyna üýtgetmeli.
Alymlaryň aýtmagyna görä, gipertoniýadan ejir çekýän adamlar, ilkinji nobatda, şulardan ýüz öwürmeli:
- Duzly önümlerden we naharlardan. Duz gan basyşynyň ýokarlanmagyna ýardam edýär, şonuň üçin çipsileri, duzly we kakadylan balygy, suharyny, duzly hyýary we beýleki gök önümleri rasiondan aýyrmaly.
- Tiz tagamdan. Bu iýmit konserwantlardan, ýagdan we beýleki goşmaça tagam berijilerden doldurylan. Bu sagdyn adamlar üçin hem peýdaly däl, gipertoniýasy bolan adamlara bolsa asla bolmaýar.
- Şekerden. Diňe arassa şekerden däl-de, onuň ýerini tutujylardan hem ýüz öwürseň dogry bolar. Şeýle etmek bilen organizm gerekli bolan glýukozany kabul edip bilmez diýip pikir etmäň. Ol muny miweleriň we gök önümleriň kömegi bilen kabul eder.