«Barselona» çökgünligi başdan geçirýär

«Atletikiň» baş tälimçisi Gaiska Garitano «Barselona» bilen Ispaniýanyň Kubogynyň 1/4 final duşuşygynyň öň ýanynda katalon klubyndaky ýagdaý baradaky pikiri bilen paýlaşdy.
— Islendik ýagdaýda-da, «Barselona» öňdebaryjydyr. Bu toparda dünýäde iň gowy futbolçylar oýnaýar. Olarda Messi, Grizman, Pike, Buskets, Rakitiç... oýnaýarka, nähili çökgünlik bolup biler? «Barselona» – bu iň gowy oýunçylary bolan iň gowy topar — diýip, Garitano belleýär.
Öň, HBS-de «Barselonanyň» çökgünligi başdan geçirýändigi barada maglumat ýüze çykdy: toparyň kapitany Lionel Messiniň ýolbaşçylar bilen dawasy üçin tomusda topardan gitmegi ahmal. Katalon metbugatynyň berýän habarlaryna laýyklykda, argentinaly hüjümçi toparyň başynda Kike Setýeni däl-de, katar «Al-Sadda» toparynyň halypasy Hawini görmek isleýär.
Şeýle-de, Messi bilen katalon toparynyň birnäçe oýunçylarynyň arasynda agzalalyk ýüze çykdy, esasanam, katalonlylaryň goragçysy Žerard Pike bilen. Şonuň bilen birlikde, Messi klubyň sport direktory Erik Abidalyň bildirişinden hem nägile boldy. Ol oýunçylaryň ählisiniň eks-tälimçi Ernesto Walwerdeden razy bolmandyklaryny, munuň bolsa netijä oňaýsyz täsir edendigini aýtdy. Muňa bolsa Messi şeýle jogap berýär:
— Dogrymy ýatsam, maňa şeýle zatlar barada gürrüň etmek ýaranok. Ýöne meniň pikirimçe, her kim öz işine jogapkärli garamaly we öz çözgütleri barada pikir etmeli. Oýunçylar meýdançada bolup geçýän zatlara jogapkärçilik çekýärler we hemme zat ýerbe-ýer bolmasa, ony ilkinji bolup biz aňlaýarys.
Kluby dolandyrmaga jogap berýänler hem öz borjuny ýerine ýetirmeli we ilkinji nobatda, özleriniň kabul edýän çözgütlerini kabul etmegi başarmaly. Meniň pikirimçe, gürrüň oýunçylar hakda gidende anyk atlary atlandyrmak hökmanmyka diýýän. Bolmasa, biz hakykata laýyk gelmeýän teswirleri alarys – diýip, Messi Instagram sahypasynda ýazýar. Messiniň Walwerdeniň gitmegine garşy bolandygy bellenilýär.
Belläp geçsek, 6-njy fewralda «Barselona» «Atletikden» (0:1) ýeňlenden soň, Ispaniýanyň Kubogyndan gaýtdy.