Türkmenistanyň Futbol federasiýasynyň resmi saýtynyň habar bermegine görä, Aziýanyň Futbol Konfederasiýasy gyzyklanma bildiren degişli taraplaryň ählisi bilen geçiren geňeşmelerinden soň, 2020-nji ýylyň 26-njy fewraly bilen 8-nji marty aralygynda Aşgabatda geçirilmegi göz öňünde tutulan futzal boýunça Aziýa çempionatynyň geçirilmeli senesini soňa süýşürdi. Bu barada AFK tarapyndan Türkmenistanyň Futbol federasiýasyna gelip gowşan resmi hatda beýan edilýär.
Futzal boýunça Aziýa çempionatynyň geçiriljek senesi soň belli ediler.
Ýatladyp geçsek, Aşgabadyň «Olimpiýa» myhmanhanasynda Türkmenistanda boljak futzal boýunça Aziýanyň çempionatynyň final böleginiň bije atyşlygynyň jemi boýunça Aziýa yklymynyň iň oňat futzal toparlarynyň 16-sy dört topara bölündi.
«A» toparyna Türkmenistanyň ýygyndy topary bilen birlikde Omanyň, Täjigistanyň we Wýetnamyň toparlary düşdi.
«B» toparyna Kuweýtiň, Gyrgyzystanyň, Liwanyň we Ýaponiýanyň toparlary girdi.
«C» toparynda Indoneziýanyň, Hytaýyň, Bahreýniň we Özbegistanyň toparlary güýç synanyşarlar.
«D» toparyna giren Saud Arabystanynyň, Koreýa Respublikasynyň, Tailandyň ýygyndy toparlary bolsa futzal boýunça Aziýa futbol konfederasiýasynyň häzirki çempiony bolan Eýran Yslam Respublikasynyň ýygyndy topary bilen bäsleşerler.
Futzal boýunça Aşgabatda geçiriljek Aziýa çempionatynyň wagty süýşürildi
- 05.02.2020 10:51
- 5.3k+
