Ýaponiýalylar sürüjisiz traktory işläp düzdüler

Kubota ýapon kompaniýasy täsin konseptini – sürüjisiz elektrik traktoryny görkezdi.
Kubota kompaniýasynyň aýtmagyna görä, häzir Ýaponiýada fermer az we olar uly meýdan böleklerini ekişe taýýarlamaly bolýarlar. Şeýle meseläni göz öňünde tutmak bilen, kompaniýa täsin konsepti — sürüjisiz traktory döretmek kararyna gelýär.
Bu ulag «X traktor» adyny aldy; ilkinji gezek ol üstümizdäki aýda Kioto şäherindäki sergide köpçülikleýin görkezildi. Konsept barada tehniki detallar ýok, diňe onuň doly ýagdaýda güýçli elektrik gurluşy bilen üpjün edilendigi belli.
X traktor köp sanly kameralaryň we datçikleriň esasynda daş-töwerek barada maglumat alýan emeli intellekt arkaly dolandyrylýar. Ol geolokasiýa sistemasy bilen enjamlaşdyrylan.
Bu täze önüm şaly ekilen ýa-da adaty meýdanlar boýunça awtonom hereket etmäge ukyply, ol başga ýumuşlaryň birnäçesinden hem baş çykarýar. Traktor howany seljerip hem-de ekişe ýa-da hasyly ýygnamak üçin meýdana çykmalymy ýa-da çykmaly däldigini hem çözüp bilýär.
Traktor güýçli elektrik gurluşy bilen birikdirilen zynjyr ýöredijileri arkaly herekete getirilýär. Traktor litiý-ion akkumulýatorlary bilen enjamlaşdyrylan we ol Gün panellerinden zarýadlanmaga ukyply, diýip Kubota kompaniýasynyň press-gullugy habar berýär.
X traktorynyň seriýaly önümçilige goýberiljekdigi ýa-da däldigi barada häzirki wagtda hiç hili maglumat ýok.
Öň, MediaPotok informasion agentligi Sýuriha ýokary tehniki mekdebiniň işgärleriniň «sürüjisiz ekskawatorlary» taýýarlap, oňa garymy özbaşdak gazmagy öwredendikleri barada ýazdy. Oňa esas hökmünde apparatyň özbaşdak garym gazmagyna kömek edýän datçikler we algoritmler bilen üpjün edilen ädimleýän enjam alyndy.