Dastin Porýe: «Ahyrky maksat — dünýäniň ýeke-täk çempiony bolmak»

UFC-niň ýeňil agram boýunça ozalky wagtlaýyn çempiony, geçen sentýabrda Habib Nurmagomedow bilen göreşde ýeňlişe sezewar bolan Dastin Porýe özüniň şu ýyldaky meýilnamalary barada gürrüň berdi.
«Meniň ahyrky maksadym — dünýäniň jedelsiz çempiony bolmak. Men diňe uly göreşlere pul goýmak bilen karýeramy dowam etdirip bilemok. Hawa, men olaryň bir bölegi bolmak isleýärin, muşdaklarymyň göwnünden turasym, «Agşamyň göreşlerini» gurnasym we tomaşa çykyşlaryny görkezesim gelýär, ýöne şol bir wagtda men jedelsiz çempion hem bolmak isleýärin. Men ömrümiň ahyryna çenli üstünliklerimiň ýanynda «ozalky wagtlaýyn çempion» diýen jümläniň bolmagyny islämok» diýip, «BloodyElbow» portaly amerikaly göreşijiniň sözüni getirýär.
Häzirki wagtda Porýe uýlugyndaky operasiýadan soň bejergi alýar, ýöne tiz wagtda oktagona dolanmagy we amatly mümkinçilik ýüze çykdygyndan ýylyň ahyryna çenli titul üçin göreşmegi niýet edinýär.
«Ýyly titul göreşi bilen ýa-da titul mümkinçiligi bilen jemlemek isleýärin — bu hakykat. Men UFC-niň reýtinginde ikinji belgide durýan. Titul üçin göreşden meni bir, belki-de iki sany uly ýeňiş daşlaşdyrýar. Elbetde, men hem islendik beýleki göreşijiler ýaly özümiň ähli ýeňlişlerim üçin öç almak isleýärin, ýöne häzir gürrüň ar almak barada däl. Gürrüň çempionlyk altyny barada gidýär, men şu wagta çenli oňa kim eýeçilik etse, şonuň bilen göreşmek isleýärin».
Öň, Porýe 18-nji aprelde Bruklinde geçiriljek UFC 249 turnirine oktagona dolanmak isleýändigini habar berdi.