Türkmenistanyň milli ýygyndysy Dünýä çempionaty – 2022-niň saýlama tapgyrynda üçünji ýeňşini gazanmagy başardy.
Türkmenistanyň Futbol Federasiýasynyň saýtynyň habar bermegine görä, şu gün paýtagtymyzdaky “Köpetdag” stadionynda geçirilen duşuşykda ýygyndy toparymyz Şri-Lankanyň milli ýygyndysyny 2:0 hasabynda ýeňlişe sezewar etdi.
Ýygyndymyza ýeňiş getiren toplary Abdy Bäşimow (44-nji minut) bilen Altymyrat Annadurdyýew (59-njy minut) öz atlaryna ýazdyrdylar.
Bu günki gazanan ýeňşinden soň 9 utuk toplan ýygyndy toparymyz “H” toparçada birinji orna geçdi. Bir duşuşygy az geçiren Koreýa Respublikasy 8 utuk bilen ikinji, 7 utukdan toplan Liwanyň hem-de KHDR-iň ýygyndylary üçünji, dördünji orunlary eýeleýärler. Şri-Lankanyň milli ýygyndysy häzirlikçe utuk toplap bilmedi.
Milli ýygyndymyz dünýä çempionaty – 2022-niň saýlama tapgyryndaky nobatdaky duşuşygyny 2020-nji ýylyň 26-njy martynda Koreýa Respublikasynyň ýygyndysynyň garşysyna myhmançylykda geçirer.
Türkmenistan DÇ–2022-niň saýlama tapgyrynda Şri-Lankadan üstün çykdy
- 20.11.2019 05:16
- 2.9k+
