Lukmanlar passiw dynç alşyň zyýanlydygyny düşündirdiler

Fiziki işjeňligiň birden pese düşmegi iki hepdäniň dowamynda saglyk üçin negatiw netijeleri ýüze çykarýar, bu barada Mignews.com-a salgylanmak bilen Trend habar berýär.
Şeýle netijä Nýuskasl uniwersitetiniň alymlary özleriniň diabeti öwrenmek boýunça geçiren barlaglary barada Ýewropa assosiasiýasynyň kongresinde gürrüň beren wagtlarynda gelýärler. Olaryň maglumaty boýunça, endik edilen işjeňligiň derejesiniň birden peselmegi bary-ýogy iki hepdäniň dowamynda saglygyň esasy görkezijileriniň ýaramazlaşmagyna, şeýle-de biliň göwrüminiň artmagyna getirýär.
Hünärmenler özleriniň eksperimenti barada aýtdylar, bu eksperimente 32 ýaşlarynda bolan orta ýaşly 28 sany meýletinçi gatnaşdy. Olaryň ählisi sagdyndy, bedenleriniň massasy hem norma laýykdy we olar “ortaça” fiziki işjeňligi görkezýärdiler. Ýagny, olar günüň dowamynda on müň ädim ýoly geçýärdiler we hepde-de 1-2 sagat sport bilen meşgullanýardylar.
Meýletinçilere fiziki işjeňligi birden pese düşürmek tabşyrylýar. Iki hepdäniň içinde olar günde 1,5 müň ädim ýol geçdiler. Soňra eksperimente gatnaşyjylar dürli hili testleri geçdiler.
Iki hepdäniň dowamynda synagdan geçýän adamlaryň biliniň göwrümi artdy – ortaça 0,8 sm. Olaryň ýag dokumalarynyň möçberi 0,5% ösdi, şeýle-de ganyň düzümindäki trigliseridiň derejesi ýokarlandy we insulina garşylyk görkezijilik artdy. Mundan başga-da, meýletinçiler fiziki işleri 4% ýaramaz ýerine ýetirdiler. Ýagny, olarda diabet we ýürek-damar keselleriniň howpy ýokarlandy, diýmek, wagtyndan öň ýogalmak howpy hem.
Haçan-da meýletinçiler özleriniň adaty durmuşyna dolanyp gelenlerinde, birnäçe hepdeden soň olaryň ähli görkezijileri başdaky ýagdaýyna gaýdyp geldi.