Ýürege iň peýdaly 10 sany önüm

Taýýarlamasy ýönekeý bolan bu ýokumly önümler her bir adamyň rasionynda bolmaly.
Günüňizi süle ýarmasyndan edilen gyzgynjak şüle bilen başlaň. Şüle Omega-3 kislota ýaglaryna, foliý kislota duzlaryna we kaliý elementine baý. Mundan başga-da, bu iýmit düzüminde gandaky “erbet” holesteriniň derejesini peseldýän birnäçe peýdaly woloknalary saklaýar. Woloknany artdyrmak üçin şülä banan bölejiklerini goşuň.
Gyzylbalyk hem Omega-3 kislota ýaglaryna baý, bu balyk gan basyşynyň derejesini peseldýär we tromblaryň damarlarda emele gelmegine mümkinçilik bermeýär. Biziň organizmimiz üçin gyzylbalygyň laýyk möçberi – hepdede iki porsiýa. Şonuň bilen biz ýürek tutma zerarly ýogalmak howpuny üçden bir bölek peselderis.
Dünýäde iň bir peýdaly önümleriň biri – awokado. Berhiziňizi ýürege peýdaly ýaglar bilen kanagatlandyrmak üçin, onuň böleklerini sendwiça ýa-da ysmanakdan edilen işdäaçara goşuň. Awokadoda “gowy” holesteriniň derejesini ýokarlandyrýan doýgun bolmadyk ýaglar saklanýar.
Şeýle ýaglaryň köp mukdary zeýtun ýagynyň düzüminde hem bar. Zeýtun ýagy Italiýa, Gresiýa, Kipr ýaly günorta ýurtlaryň aşhanasynda giňden ýaýran. Bu ýerlerde beýleki Ýewropa döwletlerine garanyňda, ýürek tutmadan ýogalmak derejesi pes. Grek hozlaryny iýiň! Munda hem Omega-3 kislota ýaglary köp.
Grek hozuna mindal ýa-da makadamiýany (awstraliýa hozy) hem goşmak bolýar. Peýdaly kislotalar bilen birlikde hoz woloknalara hem baý. Ýokumly we peýdaly ýagyň çeşmesi.
Nähilidir bir süýji zatlary isleýäňizmi? Miwelere geçeliň, ter ýa-da doňdurylan. Biziň iň gowy görýänimiz – ýertudana, malina, zemlýanika, çernika, smorodina – bularyň hemmesi ýürek keselleriniň we rak keseliniň güýçlenmek howpuny peseldýän antiçişme alamatlara eýe.
Noýbany hem ýatdan çykarmalyň! Ol peýdaly woloknalardan, Omega-3 kislota ýaglaryndan we kalsiýden doly, noýba örän peýdaly. Esasanam, merjimek, türk nohudy we noýbasy.
Işdäaçarlara geçeliň. Olar üçin esasy komponent ysmanak. Ol bize uzak wagtlap oňat formada galmaga kömek edýär, düzüminde lýutein, foliý kislota duzlaryny, kalsiý we wolokna elementlerini saklaýar.
Zygyr çigitleri hem woloknalardan we Omega-3 kislotalardan paýsyz däl. Azrak çigidi şülä ýa-da bulka goşuň, netijede sagdyn ertirligiň üstüni ýetirersiňiz.
Biziň onlugymyzy soýa jemleýär. Ol holesterini peseldýär we peýdaly proteinleriň çeşmesi hasaplanýar, çünki ol düzüminde doýgun ýagyň pes derejesini saklaýar.