Türkmen wekiliýeti Tokio – 2020-niň Guramaçylyk komiteti bilen duşuşar

Türkmen wekiliýetiniň Ýaponiýa döwletine saparynyň çäklerinde Türkmenistanyň sport we ýaşlar syýasaty ministri Ýaponiýanyň Milli Olimpiýa komitetiniň we Tokio – 2020-niň Guramaçylyk komitetiniň wekilleri bilen duşuşar. Bu barada Orient agentligi habar berýär.
Türkmenistanyň wekiliýeti saparyň barşynda eýýäm Olimpiýa şäherçesiniň gurluşygy bilen tanyş boldy.
— Ýaponlar bellenen tertipden öňde barýarlar. Bu depgini bilen olar köp sanly daşary ýurtly myhmanlary haýran galdyrýarlar – diýip ministr D.Gulgeldiýew belledi.
Tokio 2020 Olimpiýa oýunlarynyň başlanmagyna 77 gün galdy. Türkmen türgenleri ýeňil atletika, dzýudo, suwda ýüzmek, boks, erkin göreş we grek-rim göreşi, agyr atletika ýaly sportuň olimpiýa görnüşleri boýunça güýçli depginlerde taýýarlyk görýärler.
Mundan öň türkmen tarapy Ýamagata prefekturasynda ýerleşen Tendo welaýaty bilen Türkmenistanyň milli olimpiýa ýygyndysy üçin türgenleşik merkezini döretmek hakynda ylalaşyk baglaşypdy. Iýul aýynda türkmen dzýudoçylary we ýeňil atletikaçylary ýapon türgenleri bilen bilelikde ilkinji okuw-türgenleşiklerini geçdi. Bu bolsa olaryň Ýaponiýanyň howa şertlerine uýgunlaşmagyna, şeýle hem sport desgalary bilen tanyşmaklaryna ýardam etdi.