14-nji dekabrda Döwletjan Ýagşymyradow Alekseý Butorin bilen duşuşar

Moskwada ACA 95 ýaryşynyň öň ýanynda metbugat maslahaty geçirildi. Onuň barşynda ýarym agyr agramda indiki geçiriljek titul göreşi yglan edildi, diýip Turkmenportal «Советский спорт» rus neşirine salgylanyp habar berýär.
Bellenilişi ýaly, 2019-njy ýylyň 14-nji dekabrynda ACA 103 ýaryşynda liganyň çempiony Döwletjan Ýagşymyradow öz titulyny Alekseý Butorin bilen göreşde gorap çykyş eder.
«Ýyl 14-nji dekabrda Sankt-Peterburgda geçiriljek ýaryş bilen jemlener. Esasy göreşde Alekseý Butorin ýarym agyr agramda çempion Döwletjan Ýagşymyradowyň guşagyna dalaş eder» diýip ACA ligasynyň Prezidenti Alekseý Ýasenko beýan etdi.
Döwletjan Ýagşymyradow — ACA (Absolute Championship Akhmat) garyşyk göreş boýunça çempion bolmagy başaran Türkmenistanyň ilkinji wekili. Watandaşymyz bu çempionlygyny 2019-njy ýylyň 16-njy fewralynda Warşawada (Polşa) geçirilen ACA 92 ýaryşynda polşaly ýarym agyr agramda çykyş edýän Karol Selinskini tehniki nokaut arkaly ýeňip gazandy. Döwletjan Ýagşymyradow 5-nji maýda Moskwada geçirilen ACB 86 ýaryşynda titulyň öňki eýesi russiýaly Batraz Agnaýewi ýeňip, ACB (Absolute Championship Berkut) garyşyk göreş boýunça çempion bolmagy başardy.
Alekseý Butorin ýarym agyr derejä geçen ýylyň ahyrynda çykdy we şol wagtdan bäri üç gezek yzly-yzyna wagtyndan öňki ýeňişleri gazandy. Ilki bilen Butorin amerikaly Kori Hendriksi nokauta gidirdi, soňra ispaniýaly Daniel Toledony, ondan soň bolsa gazagystanly Ýewgeniý Ýegemberdiýewi ýeňmegi başardy. D.Ýagşymyradowyň geljekki garşydaşy Sankt-Peterburgda doglup, şol ýerde ulaldy. Ýetginjek wagty sportuň dürli görnüşleri bilen, söweşjeň görnüşlerinden — karate boýunça türgenleşdi we sary guşagyň eýesi boldy. Bu günki gün ol 33 ýaşynda bolup, 15-3-0 rekorda eýedir. Göreşleriniň ählisini wagtyndan öň tamamlady.