Lionel Messi FIFA boýunça ýylyň iň gowy oýunçysy boldy

«Barselonanyň» we Argentinanyň ýygyndysynyň hüjümçisi Lionel Messi FIFA-nyň wersiýasy boýunça ýylyň iň gowy oýunçysy diýlip ykrar edildi, diýlip guramanyň resmi saýty habar berýär. Baýrak gowşurmak dabarasy Milanda (Italiýada) geçirildi.
Argentinaly Lionel Messiden başga-da, bu baýraga «Ýuwentusyň» portugaliýaly hüjümçisi Kriştianu Ronaldu we «Liwerpulyň» gollandiýaly goragçysy Wirjil wan Deýk dalaş etdi. Bu baýrak argentinaly futbolçy üçin karýerasynda altyn baýrak boldy. Messi «Barselona» bilen Ispaniýanyň çempionatynda ýeňiş gazandy, şeýle hem UEFA-nyň Çempionlar ligasynda çärýek final tapgyryna bardy. 
Ýylyň iň gowy zenan futbolçysy hökmünde ABŞ-nyň ýygyndysynyň ýarymgoragçysy Megan Rapino saýlandy. Milli ýygyndynyň düzüminde amerikaly futbolçy zenan 2019-njy ýylyň Dünýä çempionatynda final duşuşygynda Niderlandlaryň ýygyndysyny 2:0 hasabynda ýeňip, çempionatyň ýeňijisi boldy. Mundan başga-da, ol 6 pökgi bilen ýaryşyň iň gowy hüjümçisi, şeýle hem iň gowy oýunçysy hökmünde ykrar edildi. 
«FIFA boýunça ýylyň oýunçysy» — baýragy 1991-nji ýyldan bäri gowşurylyp gelinýän futbol baýragydyr. Ilkibaşda ol diňe iň gowy erkek futbolça gowşurylýardy, 2001-nji ýyldan başlap, «iň gowy zenan futbolçy» baýragy hem döredildi.
Iň gowy tälimçi hökmünde «Liwerpulyň» baş tälimçisi Ýurgen Klopp we ABŞ-nyň zenanlar futbol ýygyndysynyň tälimçisi Jill Ellis saýlandy. «Liwerpul» 2018/2019 möwsümde UEFA-nyň Çempionalar ligasynyň ýeňijisi, ABŞ-nyň zenanlar ýygyndysy bolsa, futbol boýunça dünýä çempiony boldular.
Wengriýanyň «Debresen» toparynyň ýarymgoragçysy Daniel Žori FIFA boýunça ýylyň iň gowy goluny geçirendigi üçin Puşkaşyň baýragyna mynasyp boldy. Žori bu goly 2019-njy ýylyň  16-njy fewralynda «Ferenswaroşyň» derwezesine jerime çyzgysynyň öň ýanyndan geçiripdi.
FIFA-nyň feýr-pelý üçin ýörute baýragyna «Lids-iň» baş tälimçisi Marselo Ýçelsa we onuň oýunçylary mynasyp boldy.
FIFA Professional futbolçylaryň assosiasiýasynyň halkara federasiýasy (FIFPro) bilen bilelikde 2019-njy ýylyň jemleri boýunça ýylyň simwoliki düzümini kesgitlediler.
2019-njy ýylyň jemleri boýunça ýylyň simwoliki düzümi: derwezeban Alison Beker («Liwerpul»); goragçylar: Wirjil wan Deýk («Liwerpul»), Mateýs de Ligt («Ýuwentus»), Marselo, Serhio Ramos (ikisi hem — «Real»), ýarymgoragçylar: Eden Azar, Luka Modriç (ikisi hem — «Real»), Frenki de Ýong («Barselona»); hüjümçiler: Kilian Mbappe («PSŽ»), Lionel Messi («Barselona»), Kriştianu Ronaldu («Ýuwentus»).