«Mançester siti» «Norwiçden» ýeňildi, «Liwerpul» birinji ornuny berkidýär

Angliýanyň Premýer ligasynyň bäşinji tapgyrynda «Norwiç» öz öýünde «Mançester sitini» 3:2 hasabynda ýeňlişe sezewar etdi.
«Norwiçden» Kenni Maklin (18-nji minut), Todd Kantwell (28) we Teýemu Pukki (50), «Sitiden» bolsa, Serhio Aguero (45) we Rodri (88) tapawutlanmagy başardy.
«Mançester siti» üçin bu ýeňliş Angliýanyň çempionatynyň şu möwsüminde ilkinjisidir. Geçen möwsümi hem hasaba alanyňda, ýurduň häzirki çempiony 18 duşuşykdan bäri ýeňilmän gelýärdi. Soňky gezek «Siti» 2019-njy ýylyň 29-njy ýanwarynda «Nýukasldan» ýeňlipdi.
Şu tapgyryň beýleki oýunlarynda «Mançester Ýunaýted» «Lesteri» 1:0 hasabynda ýeňmegi başardy. Ýeke-täk pökgini 11 metrlik jerime urgusyndan Reşford geçirdi.
«Çelsi» bolsa 5:2 hasabynda «Wulwerhemptondan» üstün çykdy. «Çelsiniň» düzüminde Temmi Abraham garşydaşyň derwezesine 3 pökgini gönükdirmegi başardy.
Premýer ligada birinji orny elden bermän gelýän «Liwerpul» «Nýukasldan» 3:1 hasabynda üstün çykdy. «Liwerpuldan» Mane 2 pökgini, Salah bolsa 1 pökgini öz adyna ýazdyrmagy başardy. Angliýanyň Premýer ligasynyň jedweli bilen şu salgyda tanşyp bilersiňi.
Tapgyryň beýleki oýunlaryndan:
"Braýton" — "Býornli" — 1:1;
"Tottenhem" — "Kristal Pelas" — 4:0;
"Şeffilt Ýunaýted" — "Sauthempton" — 0:1.