Gurban Berdiýew Daşoguz welaýatynda futbolyň ösdürilişi bilen tanyşdy

Meşhur türkmen we rus futbol hünärmeni Gurban Berdiýew Daşoguz welaýatyna baryp gördi, diýip Turkmenportal habar berýär.
«Rubiniň» öňki baş tälimçisi Türkmenistana saparynyň çäklerinde ýurdumyzyň sebitlerinde futboluň ösdürilişi bilen tanyşlygyny dowam edýär. Ýurdumyzyň demirgazyk welaýatynda bolmagynyň dowamynda Gurban Berdiýew «Garaşsyzlyk» we «Sport toplumy» stadionlarynda futbolyň ösdürilmegi üçin döredilen şertler bilen tanyşdy. Bu stadionlar 7800 we 10 000 tomaşaça niýetlenendir. G.Berdiýew çagalar toparlarynyň türgenleşigine gatnaşdy we Türkmenistanyň IIM-niň «Köpetdag» futbol toparynyň ýanynda çagalar-ýetginjekler sport mekdebiniň şahamçasyny açdy. Öňräk ýurdumyzda adybelli bu futbol toparynyň şahamçalary Ahal, Mary we Lebap welaýatlarynda açylypdy.Bu sport mekdepleriniň maksady ýetginjek ýaşdan futbolçylary taýýarlamagyň ulgamyny ýola goýmakdyr.
Saparyň çäklerinde G.Berdiýew Taryhy-ülkäni öwreniş muzeýiniň maslahatlar zalynda futbol jemgyýetçiliginiň wekilleri bilen duşuşyk geçirdi. Onuň dowamynda meşhur hünärmen tälimçileriň işindäki şertler we kynçylyklar, tälimçileriň taýýarlyk meselesi bilen tanyşdy.
Gurban Berdiýew zerur bolan tälimçilik okuwlaryny gurnamaga we bu işe Tatarystanyň futbol akademiýasynyň hünärmenlerini çekmäge taýýarlygyny belledi. Şeýle hem ol Türkmenistanyň sebitlerine saparlarynyň netijeleri boýunça Türkmenistanda futboly mundan beýläk hem ösdürmek boýunça degişli tekliplerini taýýarlajakdygyny belledi.