Messiniň interwýusy: «Barselona» ähli ýaryşlarda ýeňiş gazanmak isleýär

Leo Messi žurnalistler bilen seýrek gürleşýär, şonuň üçin hem onuň interwýusy aýratyn waka. Milli ýygyndylaryň duşuşyklary üçin arakesmede «Barselonanyň» hüjümçisi katalonlaryň «Sport» gazeti bilen gürrüňdeş boldy. Dünýä meşhur futbolçynyň gürrüňlerinden bölekleri siziň dykgatyňyza ýetirýäris.
«Men Neýmaryň dolanyp gelmegini islärdim. Onuň gelmegine garşy bolýanlara düşünýän. Çünki hemmeler Neýiň nädip gidendiklerini bilýärler. Ýöne sport nukdaýnazaryndan Neýmar dünýäniň iň gowy futbolçylarynyň biri. Onuň biziň toparymyzda oýnamagy biziň öňde goýan maksatlarymyza ýetmek mümkinçiligimizi ýokarlandyrar. Gepleşikler başa barmady, şonuň üçin bir bar bolan düzümimizde ünsi jemlemeli.
«Barselona» Neýmary dolap getirmek üçin ýeterlik tagalla etdimi? Gepleşikleriň geçişi barada mende känbir maglumat ýok. Men diňe Neýmar bilen gürleşdim. Ol örän yzyna dolanasy gelýärdi. Toparyň ony hakykatdan hem yzyna dolap getirmek isländigini anyk bilemok, ýöne Neýmar yzyna dolanyp gelmegi umyt etdi».
– Siz Ispaniýanyň çempiony derejäňizi elden gidirip, Çempionlar ligasynda ýeňiş gazanmaga razy bolardyňyzmy?
– Ýok. Möwsüm başlanda biz elmydama ähli baýraklary gazanmak isleýändigimizi we muňa ýetmek üçin güýjümizde baryny etjekdigimizi aýdýarys. Öz oýnumyzy tiz tapmagy umyt edýäris. Biz ähli baýraklary almak sileýäris.
Elbetde, men Çempionlar ligasynda ýeňiş gazanmak isleýärin. Emma möwsümiň başynda men saýlamak islemeýärin — ikisini hem alasym gelýär.
– Bartomeunyň bellemegine görä, siziň şertnamaňyzda size möwsümiň ahyrynda topardan mugt gidip bilmeklige degişli bölüm bar. Bu dogrumy?
– Muny tassyklap bilmerin. Biziň şertnamamyzda maglumatlary gizlin saklamak bellenilen. Bir zady aýdyp bilerin - «Barselonada» mümkin boldugyndan uzak wagtlap bolmagy isleýärin. Men bütin karýeramyň dowamynda bu ýerini öz öýüm diýip atlandyryp gelýärin.
Öň belläp geçişim ýaly, maňa toparymyň ýeňişli ruhda bolmagy zerur, çünki ýeňiş gazanmagy dowam etmek isleýärin. Meniň üçin pul we şertnama hiç zat aňlatmaýar. Meni başga zatlar ruhlandyrýar, esasan — ýeňiş.
Bu ýerde tä oňat çykyş etmegi başarýançam oýnamagy dowam etdirmek isleýärin.
Özüni «Altyn pökgi» almaklykda faworit hasaplamaýar.
«Bu baýragy almak ugrunda men faworitmi? Bilemok. «Altyn pökgi» geň baýrak, onda kimiň fawotirdigini hiç kim bilmeýär. Soňky ýyllarda olar toparyň gazanýan üstünliklerine seredýärler, bu erbet däl. kähalatlarda baýragy dünýä çempionaty üçin gowşurýarlar.
Men hiç wagt hem özümi bu ýaryşda faworit hasaplamadym. Öň belläp geçişim ýaly, indiwidual baýraklar meniň üçin ikinji derejeli zat».
– Ýakynda Kriştianu siziň bilen günortanlyk edinmek isleýändigini aýtdy. Siz onuň çakylygyny kabul edersiňizmi?
– Elbetde, gürrüňsiz. Men hemişe belleýşim ýaly, meniň onuň bilen hiç hili gapma garşylygym ýok. Biz ýakyn dostlar bolmasak hem, dürli çärelerde biz onuň bilen bile gatnaşýarys.
Günortanlyk nahary barada anyk aýdyp bilmen. Çünki düşnükli sebäplere görä, biziň bir wagtda duşuşyp biljegimiz belli däl. Ýöne men uly höwes bilen çakylygy kabul ederdim.