Gurban Berdiýew Türkmenistana geldi

Meşhur türkmen hem rus futbol hünärmeni Gurban Berdiýew Türkmenistana geldi. «Turkmenportalyň» habar bermegine görä, hünärmen Aşgabada gelen ilkinji gününde Türkmenistanyň Futbol federasiýasynyň (TFF) jogapkär işgärleri bilen çagalar futbolyny ösdürmegiň meselelerini maslahatlaşdy.
TFF-de habar berlişi ýaly, Türkmenistana saparynyň dowamynda Gurban Berdiýew welaýatlara baryp görmegi we ýurdumyzyň sebitlerinde furbolyň ösüşi, şol sanda çagalar-ýetginjekler futbolynyň ösüşi bilen gyzyklanmagy meýilleşdirýär.
Bu sapar «Rubin» futbol toparynyň öňki baş tälimçisiniň Aşgabada şu ýylda eýýäm ikinji saparydyr. Şu ýylyň martynda Gurban Berdiýew ýurdumyzyň futbol jemgyýetçiliginiň wekilleri bilen duşuşdy, «Ahal», «Köpetdag», «Aşgabat» futbol toparlarynyň we Türkmenistanyň ýetginjekler ýygyndysynyň futbolçylary üçin açyk türgenleşikleri geçirdi.
2019-njy ýylyň iýun aýynda Tatarystan Respublikasynyň Prezidenti Rustam Minnihanow Gurban Berdiýewe futbolçylary körpe ýaşdan taýýarlaýan tapgyrlaýyn ulgamy we ýurduň esasy şäherlerinde şahamçasy bolan futbol akademiýalaryny gurnamagy teklip etdi.
Gurban Berdiýew 1952-nji ýylyň 25-nji awgustynda Aşgabatda dünýä indi. 1967-1971-nji ýylda Aşgabatdaky döwlet demir ýol ulag tehnikumynda, 1971-1975-nji ýyllarda bolsa Türkmen döwlet uniwersitetinde, 1989-1991-nji ýyllarda bolsa, Moskwa şäherindäki tälimçileriň ýokary mekdebinde bilim aldy.
Futbolçy bolup oýnan ýyllarynda Gurban Berdiýew ýarymgoragçy we kähalatlarda goragçy bolup çykyş etdi. 1959-nji ýylda Aşgabatda futbol bilen meşgullanyp başlady. Dürli ýyllarda «Gurluşykçy», «Kolhozçy» (Aşgabat), SKA we «Rostselmaş» (Don boýundaky Rostow), «Kaýrat» (Almaata) toparlarynda çykyş etdi.
Köp wagtlap ol «Rubin» (Kazan) toparynyň baş tälimçisi bolup işledi. Onuň ýolbaşçylygynda topar 478 duşuşyk geçirdi (208 ýeňiş, 140 deňme-deňlik, 130 ýeňliş).«Rubin» topary bilen G.Berdiýew 2008 we 2009-njy ýyllarda Russiýanyň çempionatyny, 2 gezek Russiýanyň superkubogyny (2010, 2012) eýeledi, 2 gezek Çempioanlar ligasynyň toparlaýyn tapgyryna gatnaşdy. 2011/2012 möwsümde Russiýanyň kubogyny eýeledi.