«Liwerpul» UEFA-nyň naýbaşy kubogyny eýeledi

UEFA-nyň naýbaşy kubogyny almak ugrundaky duşuşykda «Liwerpul» oýundan soňky 11 metrlik urgular boýunça «Çelsiden» üstün çykmagy başardy, diýip UEFA-nyň resmi saýty habar berýär.
Duşuşyk Stambuldaky «Wodafon Arena» stadionynda geçirildi. Duşuşykda hasaby «Çelsiniň» hüjümçisi Oliwýe Žiru açdy. «Liwerpulda» 48-nji minutda Sadio Mane tapawutlanmagy başardy. Belläp geçsek, Mane UEFA-nyň naýbaşy kubogyny almak ugrundaky ýaryşlarda gol geçirmegi başaran ilkinji senegallydyr. Duşuşyň esasy wagty 1:1 hasabynda deňme-deňlikde tamamlandy. Goşmaça wagtda Sadio Mane ikinji pökgini derwezä gönükdirmegi başardy. «Çelsi» penaltiden Žorže Frellonyň ýerine ýetirmeginde pökgi bilen hasaby deňledi. Oýundan soňky 11 metrlik urgularda «Liwerpulyň» futbolçylary 5:4 hasabynda ýeňmegi başardylar.
«Liwerpul» bu kubogy dördünji gezek eýelemegi başardy we bu görkeziji boýunça «Real» bilen deňleşdi. «Barselona» bilen «Milan» bir ýeňiş öňdeligi saklaýar. UEFA-nyň naýbaşy kubogyny häzirki wagta çenli 24 topar eýelemegi başardy. «Liwerpulyň» baş tälimçisi Ýurgen Klopp tälimçilik karýerasynda 800-nji oýnuny geçirdi. Galyberse-de, ol UEFA-nyň naýbaşy kubogyny eýelemegi başaran ilkinji nemes tälimçi boldy.
UEFA-nyň naýbaşy kubogyny almak ugrundaky duşuşyga ilkinji gezek zenan emin — fransiýaly Stefani Frappar eminlik etdi.
UEFA-nyň naýbaşy kubogy — resmi futbol ýaryşy bolup, ol täze möwsüme badalga berýär. Onda UEFA-nyň Çempionlar ligasynyň ýeňijisi bilen UEFA-nyň Ýewropa ligasynyň ýeňijileri duşuşýar.