Russiýa Federasiýasynyň Tatarystan Respublikasynda geçirilen göreş boýunça Dünýä çempionatynyň netijeleri boýunça Türkmenistandan baran türgen altyn medal eýeledi. Bu barada «Советский спорт» neşiri habar berýär.
Ýaryşa dünýäniň 42 döwletinden 230 türgen gatnaşdy. Türkmen türgeni Begenç Kakalyýew 65 kilogram agram derejede çykyş edip, altyn medala mynasyp boldy. Göreş boýunça Dünýä çempionatynda erkekleriň we 18 ýaşa çenli ýetginjekleriň arasynda medallaryň jemi 10 toplumy ugrunda ýaryşlar geçirildi. Medal hasabynda Russiýa Federasiýasynyň ýygyndysy ýeňiş gazandy.
Ýaryşlaryň jemleýji göreşleri Tatarystan Respublikasynyň Sabin etrabynyň Minger obasynda tatar medeniýetiniň festiwalynyň — «sabantuýyň» 35 müňden gowrak myhmanynyň tomaşa etmeginde geçirildi.
«Göreş» sporty X asyrda emele gelip, türki halklaryň arasynda uly meşhurlyk gazandy. Sportuň bu görnüşi boýunça ilkinji Dünýä çempionaty 1999-njy ýylyň maýynda Daşkentde geçirildi we şol wagtdan bäri göreşiji türgenler tutuş dünýäde gurnalýan dürli derejeli ýaryşlarda duşuşýarlar.
Türkmen pälwany göreş boýunça dünýä çempiony boldy
- 26.06.2019 00:15
- 6.6k+
