14-nji noýabrda günüň ikinji ýarymynda Hasyl toýy mynasybetli baýramçylyk maksatnamasynyň çäklerinde Söwda-senagat edarasynda “Türkmenistanyň Garaşsyzlygynyň şanly 30 ýyllygy: ýurdumyzyň oba hojalyk pudagynda ýetilen sepgitler we öňde durýan möhüm wezipeler” atly ylmy-amaly maslahat geçirildi. Foruma ugurdaş edaralaryň hünärmenleri, Agrar partiýasynyň, hojalyk jemgyýetleriniň wekilleri hem-de obasenagat ulgamynda işleýän telekeçiler, alymlar we bilermenler, daşary ýurtly hyzmatdaşlar, talyp ýaşlar gatnaşdylar.
Maslahatyň esasy meseleleriniň hatarynda ýurdumyzyň oba hojalygynda gazanylan üstünlikler hem-de amala aşyrylýan özgertmeler, ekinleri ýetişdirmekde ylmyň iň gowy tejribelerini ulanmak we seçgiçilik bilen bagly ugurlar boldy. Türkmen çig malyndan taýýar önümleri dünýä bazarlarynda ilerletmek, Türkmenistanyň pagtaçylyk we pagtany gaýtadan işleýän senagatyny ösdürmegiň wezipelerine hem garaldy.
Oba hojalygynda hyzmatdaşlygy ösdürmek barada sanly ulgam arkaly geçirilen maslahatyň barşynda daşary ýurtlaryň ylmy-barlag institutlarynyň alymlary, kompaniýalaryň we halkara guramalaryň ýolbaşçylarydyr wekilleri çykyş etdiler.
