Fransiýanyň merkezindäki Lionda geçirilýän doganlar Lýumýerler adyndaky festiwaly gurnaýjylar kino baýragyny täze zelandiýaly režissýor Jeýn Kempiona gowşurdylar. Bu barada olaryň Twitter sahypasynda habar berilýär diýip, TASS belleýär.
Kempion dünýä kinematografynyň ösüşine goşan goşandy üçin sylaglandy. Onuň iş meşhur filmi “Pianino” bolup, bu film üçin ol Halkara Kann festiwalynyň Altyn palma şahasyna, şeýle-de iň gowy ssenariýa üçin “Oskar” baýragyna mynasyp boldy. Şu ýyl 67 ýaşly Kempion alty ýyllap döredijilik dymyşlygyndan soň, özüniň täze “The Power of the Dog” filmini hödürledi. Amerikaly ýazyjy Tomas Sewijiň adybir romanyna esaslanýan bu film Wenesiýa kinofestiwalynda eýýäm “Kümüş ýolbarsa” mynasyp boldy.
Lionda geçirilýän kino forumyny gurnaýjylaryň habar bermegine görä, Kempionyň sylaglanmagy şu ýyl aradan çykan fransiýaly režissýor we ssenariýaçy Bertran Tawernýeniň iň soňky niýetleriniň biridi. Ol köp ýyllap festiwaly gurnaýjy “Lýumýer instituty” kino merkeziniň başlygy boldy.
“Kinematografyň Nobel baýragy” hasaplanýan doganlar Lýumýerler adyndaky baýraga öň Frensis Ford Koppola, Jeýn Fonda, Wong Kar-Waý, Katrin Denew, Martin Skorseze, Pedro Almodowar, Kwentin Tarantino, Ken Louç, Žerar Depardýe, Miloş Forman, Klint Istwud mynasyp boldy. Geçen ýyl ol belgiýaly kinorežissýorlaryň duetine, doganlar Dardennlere – Lýuk bilen Žan Pýere berildi.
