Ilon Maskyň SpaceX kompaniýasy sentýabr aýyna çenli Starlink hemra ulgamynyň kömegi bilen tutuş dünýäni simsiz internet bilen üpjün etmegi meýilleşdirýär. Bu barada amerikan awiakosmiki korporasiýasynyň prezidenti Gwinn Şotwell habar berýär. Muny rg.ru ýetirýär.
“Biz 1800 töweregi hemrany üstünlikli goýberdik. Bu hemralar iş orbitasyna ýetende, biz global internet gurşawyna eýe bolarys, ýöne soň bize düzgünleşdiriji edaralar tarapyndan rugsat almak gerek bolar” – diýip, ol Macquarie Group tehnologiýa web-konferensiýasynda aýtdy.
Onuň aýtmagyna görä, SpaceX 12 müň töweregi hemrany goýberer. Taslamanyň umumy bahasy 10 mlrd dollar bilen bahalandyrylýar.
ABŞ-nyň Federal aragatnaşyk komissiýasy şu ýyl SpaceX-iň meýilleşdirilişinden has pes ýer orbitasynda käbir Starlink hemralaryny ýerleşdirmek boýunça meýilnamalaryny makullady. Bu häzirki wagtda internete elýeterliligi bolmadyk adamlara ýokary tizlikli giň zolakly interneti bermäge kömek eder.
Starlink ulgamy ýer orbitasynda agramy 500 kg çenli bolan birnäçe kiçi enjamlary ýerleşdirmegiň hasabyna internete elýeterliligi üpjün etmek üçin niýetlenendir. 2019-njy ýylyň maý aýynda kosmosa onuň ilkinji 60 enjamy uçuryldy.
