Türkmenistanyň Sport we ýaşlar syýasaty ministrliginiň Türkmenistanyň ýokary sport ussatlygy mekdebiniň agyr atletika bölüminiň tälimçi-mugallymy Meretguly Sähetmyradowa sport ýaryşlarynda ýeňiji bolup, baýrakly orunlary eýeleýän türgenleri taýýarlandygyny göz öňünde tutup, Aşgabat şäheriniň Olimpiýa şäherjiginiň 4-nji jaýynyň birinji gatynda ýerleşýän üç otagly 149 inedördül metr ölçegi bolan 24-nji öýi sowgat berildi. Degişli Buýruga Türkmenistanyň Prezidenti gol çekdi.
Şeýle hem Meretguly Sähetmyradow hem-de onuň şägirdi türkmen agyr atletikaçysy, 2018-nji ýylyň dünýä çempiony Ýulduz Jumabaýewa «Watana bolan söýgüsi üçin» medalyna mynasyp boldular.
Mundan başga-da, Türkmenistanyň Prezidenti Ýulduz Jumabaýewa «Lexus LX570 Sport Plus» kysymly awtoulagyny sowgat berdi.
Häzirki wagtda Ý.Jumabaýewa ýurdumyzyň milli ýygyndysy bilen bilelikde aprel aýynda Özbegistanda geçirilmegi meýilleşdirilýän Aziýanyň çempionatyna taýýarlyk görýär. Bu ýaryşlaryň netijesinde Tokioda geçiriljek Olimpiýa oýunlarynda ýurdumyza wekilçilik etjek türgenler kesgitlener.