Ýaponiýada dünýädäki iň çalt superkompýuteri doly kuwwatynda işe girizmek dabarasy boldy diýip, ntv.ru habar berýär.
Ýapon hünärmenleri “Fugaku” superkompýuterini doly kuwwatda bir aý ir işletmek kararyna geldiler. Aslynda, muny aprel aýynda amala aşyrmak meýilleşdirilipdi, ýöne Ýaponiýanyň Tebigy ylymlar institutynyň hasaplaýyş merkezi alymlaryň COVID-19 pandemiýasy bilen baglanyşykly alyp barýan köp sanly gyssagly barlaglary bilen baglylykda, superkompýuteri ir işe girizmek kararyna geldi.
“Fugaku” 2020-nji ýylyň aprel aýynda bölekleýin işe girizildi. Iýun aýynda ol dünýäniň iň kuwwatly superkompýuterlerini kesgitleýän “Top-500” halkara taslamasynyň hünärmenleri tarapyndan dünýäde iň çalt superkompýuter diýlip ykrar edildi. Noýabr aýynda bu status ýene bir gezek tassyklandy.
Häzir Fujitsu korporasiýasy tarapyndan döredilen superkompýuter ýüzden gowrak dürli barlaglara gatnaşýar. “Fugaku” superkompýuteri sekuntda 415 kwadrillion hasaby amala aşyrmaga ukyply. Bu öň dünýäde iň çalt superkompýuter hasaplanan, häzir sanawda ikinji orna düşen Ok-Rijdäki ABŞ-nyň milli barlaghanasynyň Summit superkompýuteriniň tizliginden 2,8 esse ýokarydyr. Üçünji orny hem amerikan superkompýuteri, dördünji we bäşinji orunlary Hytaýyň maşynlary eýeleýär.
