Russiýa Federasiýasynyň Saglygy goraýyş ministrligi koronawirusa garşy “Sputnik V” sanjymynyň saklanyş we daşaýyş temperaturasyny üýtgetdi, indi rugsat berilýän aralyk 2-8 gradus diýip, Saglygy goraýyş ministri Mihail Muraşkonyň beýanyna salgylanmak bilen RIA Nowosti habar berýär.
“Saglygy goraýyş ministrligi “Sputnik V” sanjymynyň bellige alyş şahadatnamasyna üýtgetmeleri tassyklady” – diýip, Muraşko aýtdy.
Onuň aýtmagyna görä, öndüriji bu görkezijide sanjymyň durnuklylygyny üpjün etmegi başardy.
“Bu sowuk režim immunobiologik serişdeleri saklamak üçin standart” – diýip, ol belledi.
“Sputnik V” sanjymynyň önümçilik ýerleriniň birinde täze saklanyş şertleri bilen çykarylyp başlanmagy gurşawy giňeltmäge we ilat üçin täze koronawirus ýokanjyna garşy köpçülikleýin sanjymlaryň elýeterliligini ýokarlandyrmaga mümkinçilik berer” – diýip, Muraşko aýtdy.
Ýatlap geçsek, “Sputnik V” dünýäde COVID-19-a garşy ilkinji bellige alnan sanjymdyr. Onuň täsirliligi 90%-den geçýär.
Derman serişdesi eýýäm Paragwaýda, Argentinada, Boliwiýada, Serbiýada, Alžirde, Palestinada, Wenesuelada, Belarusda, Türkmenistanda we Wengriýada bellige alyndy.