Statistika baradaky döwlet komitetiniň berýän maglumatlaryna görä, dünýäde möwç alýan koronawirus pandemiýasyna garamazdan, Türkmenistan eksportyny yzygiderli ýokarlandyrmagyny dowam etdirýär. Bu barada ORIENT agentligi habar berýär.
2020-nji ýylyň ýanwar-iýul aýlarynda ýurtda gaz we nebitden daşary öndürilen önümleriň möçberi geçen ýylyň degişli döwri bilen deňeşdirilende, 8% ýokarlandy. Munuň şeýle bolmagyna, köp babatda, gaýtadan işleýän pudaklaryň sanynyň artmagy, türkmen önümleriniň hiliniň ýokarlanmagy we daşary ýurtlarda mahabatlandyrylmagy ýardam etdi.
Kükürdüň (43,3%), mineral dökünleriň (73,4%), çig ýüpegiň (33,7%), ýoduň (27%) eksporty ep-esli artdy. Bu önümler ýurduň ýokary tehnologiýaly senagat kärhanalarynda öndürilip, bahasynyň we hiliniň gatnaşygy bilen daşary ýurtly alyjylary özüne çekdi.
Türkmenistan üstümizdäki ýylyň 7 aýynda egin-eşikleriň we taýýar dokma önümleriniň eksportyny ep-esli ýokarlandyrdy, ýagny bu önümleriň eksporty geçen ýylyň degişli döwri bilen deňeşdirilende, 23,1% artdy. Munuň özi 2018-nji ýylda Türkmenistan Halk Maslahatynyň ilkinji mejlisinde ýurtda ösdürilip ýetişdirilen ähli pagtany gaýtadan işlemek barada öňe sürlen başlangyjyň durmuşa geçirilmeginiň miweleriniň biri boldy. Şondan bäri dokma kärhanalary harytlarynyň dürlüligini ep-esli giňeltdiler we görnüşi ýaly, önümlerini daşary ýurtlara ugradyp başladylar.
Türkmenistan hasabat döwründe hususy pudak tarapyndan öndürilen sabyn we ýuwujy serişdeleriň eksportyny hem artdyrdy. Getirmeler 2019-njy ýylyň ýanwar-iýul aýlary bilen deňeşdirilende, 43% ýokarlandy. Senagatlaşmagyň ýokary depgini we gaýtadan işleýän täze kärhanalaryň açylmagy netijesinde, Türkmenistan öz önümleriniň eksportynyň durnukly ösüşini saklamagy başardy.