24-nji fewraldan 25-nji fewrala geçilen gije UEFA-nyň Çempionlar ligasynyň pleý-off tapgyrynyň jogap oýunlary geçirildi. Olaryň netijeleri boýunça 1/8 finalyň ýene dört gatnaşyjysy belli boldy.
Agşamyň esasy täsirli wakasy «Budýo-Glimt» toparynyň «Interden» üstün çykmagy boldy. Norwegiýanyň kluby «San-Siroda» geçirilen jogap oýnunda-da 2:1 hasabynda ýeňiş gazandy we iki duşuşygyň netijesi boýunça (5:2) ynamly indiki tapgyra çykdy. Ýens-Petter Heuge gol geçirip, Milan klubuny ýene bir gezek lapykeç etdi, Hokon Ewýen bolsa myhmanlaryň artykmaçlygyny artdyrdy. «Inter» bu gollara Alessandro Bastoniniň goly bilen jogap berdi, ýöne bu duşuşygyň netijesini üýtgedip bilmedi.
«Atletiko» öz meýdançasynda «Brýugge» toparyny 4:1 hasabynda utup, umumy 7:4 hasaby bilen 1/8 finala çykdy (birinji oýunda 3:3 hasabynda deňme-deňlik bolupdy). Bu duşuşykda het-trik eden Aleksander Sýorlot esasy gahryman boldy. Madridliler oýnuň gidişini doly ele alyp, duşuşygyň ahyrynda dartgynlylygyň döremegine ýol bermedi.
«Baýer» «Olimpiakos» bilen 0:0 hasabynda deňme-deň oýnady we ilkinji duşuşykdaky (2:0) ýeňşi bilen ýaryşy dowam etdirmäge hukuk gazandy. Germaniýanyň kluby ýaryşyň soňky ýedi oýnunyň bäşisinde öz derwezesini eldegrilmesiz saklamagy başardy.
«Nýukasl» gollara baý bolan oýunda «Karabahy» 3:2 hasabynda utdy. Birinji duşuşygy hem hasaba alanyňda, iňlisler umumy 9:3 hasaby bilen ýeňiş gazandy. Bu garşydaşlyk ýaryşyň taryhynda iň netijeli duşuşyklaryň biri boldy — toparlar jemi 12 gol geçirdi.
1/8 finala çykan toparlar:
- «Atletiko»
- «Baýer»
- «Budýo-Glimt»
- «Nýukasl»
Şu gije 1/8 finalyň ýene dört gatnaşyjysy belli bolar:
- «Atalanta» — «Borussiýa» Dortmund (22:45)
- «Ýuwentus» — «Galatasaraý» (01:00)
- «PSŽ» — «Monako» (01:00)
- «Real» — «Benfika» (01:00)
1/8, 1/4, 1/2 finalyň we finalyň bije çekilişigi 27-nji fewralda geçiriler.
