Tebigatçy Iolo Uilýams Uelsdäki derýada ýabany samyra duşdy. Bu jandar Britaniýada soňky 400 ýylda ilkinji gezek göründi diýip, Bi-bi-si habar berýär.
Samyrlar aw sebäpli bu sebitden ýitipdi, ýöne olaryň populýasiýasy soňky 20 ýylda dikelip başlady. “Men Uelsde täsin ýabany tebigaty, geň zatlary gördüm, ýöne bu pursat birinji orunda durýar” – diýip, Uilýams öz täsirleri bilen paýlaşdy.
Samyryň nireden peýda bolandygy belli däl. Uelsde samyrlar gorag astynda bolup, goraghanalarda saklanýar. Olary ýabany tebigata goýbermek üçin bolsa ýörite ygtyýarnama gerek, ýöne Uelsiň Tebigy baýlyklary dolandyryş guramasynyň şeýle ygtyýarnamany bermändigi anyklandy.
Ekologlar eýýäm köpeliş alamatlaryny ýüze çykardy: derýada samyr çagalary göründi.
Doktor Robert Nidhem bu jandarlaryň ýerli tebigat üçin peýdalydygyny, olaryň bentleri, öýjagazlary gurup, kanallary gazyp, beýleki görnüşler üçin ýaşaýyş gurşawyny döredýändigini belleýär. Şol sebäpli olar “tebigatyň inženerleri” diýlip atlandyrylýar.
Şeýle-de bolsa, samyrlaryň peýda bolmagy hemmeleri begendirmedi. NFU Cymru-nyň prezidenti Aled Jons käwagt samyrlaryň döreden bentleriniň oba hojalyk ýerlerinde suw basmalaryna getirýändigini belledi. Käbir daýhanlar samyrlaryň meýdanlara, agaçlara we ekinlere zeper ýetirmeginden gorkýar.
