Interýeri Disney studiýasynyň multfilmlerinden ylham alan jaý Uelsiň Denbişir graflygyndaky Ril şäherinde satuwa çykaryldy. Bu barada Sky News habar berýär.
Bu özboluşly jaý filmleriň meşhur gahrymanlarynyň ägirt uly suratlary bilen bezelen. Jaýyň bir otagy 1992-nji ýylyň “Aladdin” multfilmine bagyşlanýar, ýene biri 1959-njy ýylyň “Ukudaky gözel” filminden Malifisentanyň otagynyň stilinde ýerine ýetirilen.
Mundan başga-da, jaýda Meri Poppins we Piter Pen basgançagy bar, ýatylýan otaglaryň biri “Şa Ýolbarsyň” stilinde bezelen. Jaýyň içini otrisatel gahrymanlaryň, şol sanda “Suw perijiginden” jadygöý aýal Ursulanyň, “Garpamykdan” Rehimsiz Şa aýalynyň we “Aladdinden” jadygöý Jafaryň portretleri bezeýär. Şeýle-de, “Ýyldyz söweşleriniň” gahrymanlary bolan freska bar.
Bellenilişi ýaly, jaýyň häzirki eýesi Disney studiýasynyň döredijiliginiň uly muşdagy bolup, “Disneýlende” 20 gezekden köp baryp görüpdir. Jaýyň bu özboluşly interýeri eýýäm potensial alyjylarda uly gyzyklanma döretdi.
Jaýyň aýratynlygy diňe bir interýer dizaýny bolman, eýsem onuň ýerleşýän ýeridir – jaý deňiz kenarynyň gapdalynda ýerleşýär. Gozgalmaýan emläk agentliginiň saýtynda jaýyň bahasynyň tas 180 müň funt sterlingdigi habar berilýär.
